點解我最後冇移民

我老竇係個典型經過殖民政府統治嘅人。一方面深深知道，自己係個因為英國殖民制度，所以有得上位嘅人，不過因為種族又受到軟性欺壓。

佢靠做普通法制下嘅律師養妻活兒，令佢對任何執法機關，例如警察、海關、證監、廉政公署等嘅執法人員，毫無白色恐懼。

不過我老竇話廿幾年前，律師公會仲係鬼佬揸fit 時，公會開年會，廖瑤珠企起身，成為香港律師公會歷史以嚟，第一個用廣東話喺年會發言嘅人。講冇兩句，啲鬼佬唔畀佢用廣東話，廖瑤珠反問：「中國人地方，點解唔可以用中文？」我老竇諗起仲拍爛手掌，對廖瑤珠非常敬佩。

91年加拿大置業

我老竇作為一個70年代開始工作，80、90年代有份延續經濟神話嘅香港人。有咁嘅背景，孫柏文話佢冇諗過、冇做過啲嘢去搞移民、攞多一本護照，你都唔會信我。

91年，我老竇已經喺加拿大溫哥華置業。因為「時辰就到」，我父母知道要決定究竟去唔去加拿大。所以同年暑假，老竇同我就去咗次做觀察。

我老竇喺溫哥華有個當時已經移咗民廿幾年嘅中學同學，佢帶我哋行溫哥華，話夏天「最好住」，當時我老竇只係點頭回應。之後回港，老竇一句：「咁已經係最好住？真係唔可以移民加拿大。」

大家一定以為就係咁，所以我冇移民。講香港人移民嘅故事，邊有可能咁簡單？

其中一個唔去加拿大嘅原因，就係因為我老竇想住喺個華人社會裏面。所以佢就開始諗，移民去新加坡。最後喺92年，佢決定參與一個計劃，就係新加坡政府畀我哋一家各人，十年時間去報到。報到之後，先攞居留權，後入籍。

拒往新加坡報到

去到千禧年，一家五口，都冇人選擇去報到。

不過有個禮拜日，老竇同我入沙田馬場跑馬，我哋企喺沙圈旁嘅馬主看台，老竇突然問我：「你大個喇，有冇諗過移民新加坡，去報到？」我話一定唔會，仲反問佢點解自己唔去。

佢話：「我老喇，你要諗吓未來。董建華咁搞法……」佢就喺呢刻使出《迫男兒漢做嘢招式譜》上排第二嘅cheap招，佢話：「係咪驚要服兵役呢？ Chicken？」

有其父必有其子，所以我就用排第一cheap招答：「唔驚服兵役。不過一旦有事，你想你個仔副棺材上，冚嘅係新加坡國旗咩？」

就係咁，我就得番本特區護照。