助理纏傳媒 曾特首好嘢！

記得911之後不久，花旗國國會通過佢哋嘅「23條」Patriots Act。當時，有好多從事電腦保安、通訊加密嘅研究員，被花旗國政府瘋狂調查。如果唔肯為政府效力，堅持獨立運作，花旗國政府就會用盡辦法終止研究員嘅工作。

唔肯就範嘅研究員，惟有放棄美籍。不過喺花旗國政府眼中，放棄國籍，精神上等同叛國，有十年唔畀返花旗國。

今日同大家分享，花旗國政府如何處置放棄美籍嘅人，係因為上個禮拜五，我做咗次客席講師，內容係講公關危機管理。當日我話，危機會否變成公關災難，視乎製造危機嘅人，大家對佢嘅預期係點。

控制社會預期

早前艷照事件，雖然啲女角喺照片中動作差唔多，但最後社會對佢哋嘅反應就非常唔同。有個女角，大家見到佢啲艷照時只會話：「好激！不過睇佢以前嗰種敢作敢為嘅個性，都算係預咗。」另一個女角，大家就會話：「乜佢唔係小朋友嘅偶像咩？上次影到個膊頭，已經出疹有allergic reaction，今次咪大鑊！」

所以公關危機管理，除咗發生壞事後嘅反應重要，仲要事前不斷控制社會嘅預期，即係expectations management。

講咁耐，入正題。上個禮拜，政府新搵番嚟嘅局長助理中，有民建聯嘅副主席蘇錦樑，被揭擁有加拿大國籍。我同大家一樣，一向對民建聯嘅預期，係佢哋愛港愛國。我覺得，如果你話有外國國籍，民建聯嘅人就連搭巴士都唔想同你同一部。

睇冰球學政治

現在搞到，如果有小朋友問我：「點樣先至學到民建聯愛港愛國嘅嗰種愛？」我會答：「好似隔籬屋嘅叔叔一樣，放工搵完二奶姐姐，買紮花番屋企，跟住話好愛老婆囉！」

不過我都好佩服蘇錦樑。好多時，香港人移民外國唔會入鄉隨俗。估唔到佢居然學會加拿大人最喜歡嘅冰上曲棍球。

喺冰球裏面，除咗睇入球刺激，仲有睇一樣叫做 body check嘅嘢。即係一個球員以高速撞到第二隊嘅球員，令對方頭破血流。

作為傳媒，就算冇能力將球射入政府隊嘅龍門，不過都body check咗「冰球蘇」。因為政治助理嘅出現，傳媒已經唔挑戰政府政策。助理纏傳媒，冇人鬧政策，功效已展現，曾特首好嘢！