計劃經濟下攞着數

今日，孫柏文想為呢幾日嚟睇過嘅兩篇文章作回應。

第一篇，係老牌時事評論員王岸然喺5月21日《信報》寫嘅文章。佢老人家，高度肯定咗例如曾淵滄同我等信奉自由經濟嘅人，成功解釋「計劃營商法」（又稱「競爭法」）嘅害處。肯定我哋成功迫使呢個死要面、唔妥協嘅政府，將呢條「經濟二十三條」法例包括嘅範圍縮減。

王岸然見到我哋努力向市民、小企業解釋後，都忍唔住話：「難怪法例經諮詢後大為縮水，由七宗罪減為四宗。」佢特別表揚，我哋自由主義者對政府立法，往往會衍生出嚟unintended consequence（非原先設想嘅後果）嘅憂慮。所以佢特別喺文章提到：「法例原意固然是保護小企業的競爭空間。」

所以今日，我想同反對呢條法例嘅戰友話，我哋用心解釋，不但會令政府取消立惡法。我哋嘅努力，仲會被人肯定。在此向王岸然發誓，七項減到四項，只等於仲有四項要更出力解釋，我哋會不負所託繼續努力！

第二篇，就係尋日喺《金手指》樓上、《兩岸三地》專欄Uncle Ray嘅文章。佢喺篇文分享咗佢對位於馬料水嘅科學園，有乜嘢感想。佢見到科學園裏「三、四幢辦公大樓，全幢丟空」，有人嘅大樓就「十室五空」，最後仲話科學園係「一片寧靜的樂土，而不是繁囂的科技中心。」

雖然，Uncle Ray知道：「數碼港及科學園都是董建華年代留下來的產物，右派經濟學家對這類的政府行為，深感厭惡。」不過都繼續話：「作為小納稅人，我倒認為科學園是一個不錯的項目，在那裏，找不到自由行的影子，沒有最『Hip』的LV、Prada等名牌的店舖，遠離都市繁囂，只有吐露港的海風，明媚的陽光，在香港，這都是已經很難得的一點點空間。」

政府強迫市民補貼

我想作嘅回應就係，喺計劃經濟之下嘅國營雜貨舖，因為價格有政府補貼，所以好平，不過搞到供不應求，排隊排第一個就好着數，但最尾嘅人往往就買唔到。變相政府強迫其他市民補貼排第一嘅人。

我作為一個以前好喜歡去數碼港流連嘅人。喺香港，如果你要感受到計劃經濟之下「排第一」嘅滋味。Uncle Ray就話去科學園，我就話去數碼港。你會感覺到社會資源絕對錯配，不過對個人就非常着數。