「加油」如何繙譯做英文

當年，日本同南韓舉辦世界盃。孫柏文因為當時非常得閒，所以就去咗南韓睇波，睇咗中國隊兩場小組賽事。未去南韓之前，我就去佐丹奴，買咗一件支持國家隊嘅T恤。

因為當年花旗國讀大學時識咗好多韓仔（無錯，佢哋真係好鍾意打交），所以去到南韓，就有位大學同學同我入場，一齊睇中國對巴西。入場前，我着咗嗰件紅黃色佐丹奴T恤。佢見到就問：「Hey，what does your shirt say？」問我究竟印喺T恤上嗰四隻中文字點解。嗰四隻中文字就係「中國加油」。

逆境用「come on」

記得當年讀大學，我間大學嘅校色就係藍色。而我哋校隊同其他學校比賽時，我哋都會大嗌「Go Blue」。所以我就同個韓仔話，嗰隻四字就係「Go China」。

究竟繙譯得啱唔啱，我就唔知。兩個英語都唔係母語嘅人，一講到要繙譯啲不能直譯嘅嘢，都係搵啲reference point好啲。

到今時今日，四川大地震後。全國好多地方都有人為鼓勵大家，自發咁話「中國加油」。因為啲鬼佬最鍾意呢啲自發現象，所以就有好多英文傳媒，爭相報道。不過去到「中國加油」呢四個字，繙譯上，我就發現好大分別。

首先，就有大陸學者形容為「大英帝國主義最後一個碉堡」嘅《經濟學人》新聞報，將「中國加油」譯成「come on China」。我喺中學讀書時，就有好多英國仔同學，用「come on」嚟打氣，往往會用喺啲面對逆境、落後嘅球隊上。

究竟「come on」係咪只適用於四川地震，呢種逆境嘅情況我就唔知，因為同啲英國仔睇波，英格蘭冇次唔係落後。

「press on」變施壓

再講，美帝旗艦嘅《華爾街日報》，就將「中國加油」繙譯成「press on China」。《華爾街日報》叫一個人或者一個國家去「press」啲嘢，絕對唔係第一次。李柱銘都試過，不過嗰次就被特區土共繙譯成「施壓」。

其實，如果今次「press on China」等於「中國加油」。上次李柱銘只係希望布殊總統，向國家領導人講：「喺人權議題上，中國政府加油！」

講真，我哋已經係全球一體化嘅社會。大家都生活、工作喺石油推動嘅hydrocarbon economy裏面。而油價徘徊喺130美元一桶嘅水平，可能今時今日用互聯網短訊程式，例如MSN嘅小朋友繙譯得最傳神。叫人哋「加油」，可能真係一句「add oil」就夠。