Tuesday, October 23, 2007

越搞托市 越未見底

今日,首先要出個更正啓事。大家都知道,花旗國財長Hank Paulson呢排忙緊搞個叫MLEC嘅「接收冇交易、冇市價債券」超級基金。基金現在喺集資階段,籌集用嚟買貨嘅錢。花旗、美銀、JP Morgan應承會參與。

上周末,意大利央行行長Mario Draghi話,Fidelity同債王Bill Gross管理嘅債券基金PIMCO都會搞埋一份。所以噚日孫柏文話Bill Gross有份。不過噚晚,PIMCO發聲明話「不會參與」。

等發掘自己市價

如果要我分析,意國央行行長應該唔係存心老點。只不過事態發展立立亂,所以先至流言滿天飛。呢個MLEC十畫都冇一撇,嗰一撇仲要係用鉛筆寫,分分鐘擦埋。

講真,呢個MLEC我上個禮拜已經鬧過,Bill Gross亦話係lame(廢)。噚日,批評「用MLEC救市」建議又多一個人。佢就係前聯儲局局長格林斯潘。佢話,呢個MLEC接收啲冇交易、冇市價嘅債券,只會拖慢 price discovery。

Price discovery係乜?就係一樣資產發掘自己嘅市價。例如,啲銀行手上有好多票面值100元嘅債券。因為冇人出價買,所以就冇交易、冇市價。格林斯潘想見到啲銀行掛牌放盤,100元冇人買,就試90、80、70餘此類推。如果要去到1元先有人肯買,就算數。起碼啲債券搵到市價。

100元跌到1元咪好大鑊?係。資不抵債嘅投資機構就會執笠,銀行需要大規模撇賬,股價一定大跌特跌。不過,市場就可以見底復活,因為有番透明度,所以財長越搞托市,債市越未見底。相信格林斯潘同Paulson講:「Hank,this plan is so hard plastic。」

煙草商人鬧醫生

不過,格林斯潘批評呢個建議,真係非常諷刺。財長搞MLEC,都係想醫番好因為信貸泡沫爆破,衍生出嚟嘅「債市停頓」問題。大家要問問自己,呢幾年信貸泡沫點嚟?咪就係格林斯潘嘅聯儲局,當年瘋狂減息,濫發鈔票而成。

格林斯潘話MLEC阻住債市復活,話債市停頓問題唔係咁醫。就好似一個前煙草商人,走去鬧一個醫生,話:「肺癌唔係咁醫o架!」成單嘢真係硬膠。

5 comments:

  1. 栢文兄...你開始有點走住"唱淡一"之路..看他那些專欄內甚麼無形之手,有形之手,無影腳,.....總之就好似萬千樣東西在阻住跌市..你不要跟他一同走火入魔.跌與不跌不是你和他一支筆一篇文章可以改變事實.你看看這兩天..跌一千點可以升回一千點...那些股民不會覺得有問題的...他們不會覺得有人托市的..就算真係覺得有人托..都覺得希望可以賺盡..個個都覺得不會死自己..你知嗎..我身邊有三個朋友都買了中人壽.一個當年招股買..一個破$20買...一個$41買...你話..3個都賺緊錢...假設中人壽跌$10都可能係小股災啦...都係一個平手..兩個賺錢的.現在市場上太多太多這些例子了.不用教精他們而令自己換來"燈王"的稱號!!送一首詩給你這個番書仔..說不定你聽過!!
    《唐伯虎 - 桃花庵歌》
    桃花塢裏桃花庵。桃花庵裏桃花仙;桃花仙人種桃樹,又摘桃花換酒錢。
    酒醒只在花前坐,酒醉還來花下眠;半醒半醉日復日,花落花開年復年。
    但願老死花酒間,不願鞠躬車馬前。車塵馬足貴者趣,酒盞花枝貧者緣。
    若將富貴比貧者,一在平地一在天;若將貧賤比車馬,他得驅馳我得閒。
    別人笑我太瘋癲,我笑他人看不穿;不見五陵豪傑墓,無花無酒鋤作田。

    最後..不要怪我長氣..我真係不吐不快..上星期六的晚體壇盛事一件接一件..好似傳家俊打決賽..F1巴西終極戰...當然仲有英超..意甲呀等等啦...但...可惜..我這個CABLE用戶一點也分享不到..想知最新的桌球賽果都係在BET365睇咋...栢文兄...我好失望..CABLE連意甲都係播巴勒莫對烏甸...CABLE完全冇得播三大勁旅的主播賽事的...我好有一種被騙的感覺...那種痛..好快連栢文兄一星期主持一次的MONEY CAFE也補償不到..約滿..就話別!!!!!!SORRY..變了投訴版\...SORRY...SORRY!!

    ReplyDelete
  2. 栢文兄,
    題外話,你點睇亞里巴巴?
    我覺得佢同屬於B2C經營模式嘅sex141好似,
    不過,計股東資金回報sex141好搵過佢好多.
    同埋,馬雲個樣都幾似道友keeper.

    ReplyDelete
  3. 亞里巴巴的價格是否合理? PE好像太高了嗎?

    現在的股市實在超乎常理, 一日可以跌1000點, 翌日, 又可以升回更多. 上升的空間有幾多? 是否又可以去到四萬點? 下跌的空間又有幾多? 見不見底呢?

    唉...

    我都係袖手旁觀, 等遲執平貨.

    ReplyDelete
  4. 亞里巴巴? 點睇都似四十大盜. 哈哈.
    呢個世界, google 一間就夠 lor

    P.S. 今日個市唔係好對路...

    ReplyDelete
  5. 見呢到咁多兄弟都講亞里巴巴,我都插下咀。本人覺得呢隻野的價格係「嚴重」偏高。雖則佢有好大巿場憧憬,但向中國呢個巿場上。與美國業務性質接近的amazon比較,根本不能相提並論。only講一個point:教育。亞里巴巴在上巿後,業務上會否存在壞帳的增長的極難避免。要用一個偏高的招股價,來買入一間向不個巿場不明朗發展的情況下的未來。我投以不信任的一票,拒絕認購。不要被富豪效應蒙上眼睛。一年前的1888亦是在偏高的招價下招股,現時仍跌穿招股價。我大膽斷言,亞里巴巴在上巿一個月內,必有低於招股價15至20%的購入機會。

    ReplyDelete