Wednesday, October 03, 2007

To 陳太:This is not a coronation

噚日,收到封朋友寄嚟嘅電郵, Subject係「陳太啓動最大吸票機!」孫柏文打開封電郵,就見到一條超連結。咁我就click落去。

一睇,原來係香港電台嘅一段網上視像新聞短片,主角就係人大常委曾憲梓。講真,我同個朋友一向以嚟都好喜歡睇曾常委同已故全國政協常委徐四民講嘢,因為真係好entertaining。如果特區有棟篤笑文化,佢哋就係攞料嘅金礦。

我同曾憲梓有共鳴

我睇完一段短片之後,就打電話畀嗰個朋友,點知佢劈頭第一句話:「今次大鑊!」我當然問點解,佢話:「以前每次聽曾憲梓講嘢,我會一路笑。跟住就會心裏面讚佢係香港第一代嘅「古惑天皇」,因為佢成功侵犯外國知識產權。不過今次,曾憲梓講咗句說話,令我有共鳴。曾憲梓令我有共鳴囉大佬!仲唔大鑊!」

我問佢曾常委講過啲乜。原來被問及關於陳方安生參選港島區立法會補選時,曾常委話自己感到「莫名其妙」。就係「莫名其妙」呢四個字,令我個朋友有共鳴。

點解?我個朋友同我差唔多大,即係都挨過建華七年之亂嘅蹂躪,成長中睇住彭定康形成今日政治取向。佢亦係港島區選民。理論上,佢應該係一個最典型會投票畀陳方安生嘅人。咁我問佢點解覺得「莫名其妙」,佢話陳太由宣佈參選至今,都未解釋過點解應該投票畀佢。

朋友繼續話:「陳太講過嘅所有嘢,葉劉淑儀都可以講。例如,話最低工資還需研究,政府已經開始落實例如停車熄匙嘅硬膠,去解決空氣污染。就連引發一連串「同納稅人分身家工運」嘅公務員一刀切加薪都認同。佢咁講同葉劉有冇分別?仲想我嗰日起身去投票,揀佢做我嘅立法會代表?唔係話?」

應該用梁家傑隻色

佢再講:「陳太可唔可以最少講一句,葉劉唔講得嘅說話?大佬!連葉劉都講到句「我年輕」啦。講到呢度我仲火滾。陳太答話自己個女都話佢仲好有活力,唔通葉劉個女會話佢阿媽冇活力咩?如果,陳太答話自己係高齡,到達退休之年,所以為港島市民同政府爭取任何嘢時,唔需要再諗「升職」,冇包袱。呢句葉劉咪唔講得囉!都唔知邊個幫陳太諗spin,咁硬膠!我估佢哋十成十仲係諗緊選舉應該用乜顏色,而唔係個選舉message。佢應該用梁家傑嗰隻粉紅色,loser's pink!」

陳太,我個朋友應該係你嘅典型支持者,安撫佢吧!For this is not a coronation。

5 comments:

  1. 一注獨贏滙豐
    輸亞媽褲穿窿

    ReplyDelete
  2. 一注獨贏沽滙豐
    輸到亞媽褲穿窿

    ReplyDelete
  3. 栢文兄有提供有效日期的.係咪褲穿窿唔好咁武斷!!!而且他推介中..三中二呀..!!
    今早栢文兄的專欄喪鬧google..我有份click過廣告...但冇喪click.!!如果栢艾兄諗住搬地盤請通知聲!!

    ReplyDelete
  4. 說得很對,陳太根本就沒有unique selling point,加上過往根本談不上民主,所以並無說服力,我支持葉太,起碼坦蕩蕩,有承擔。一向都幾欣賞李柱銘,黎智英但今次真係對佢地好失望,為了勝利,便什麼也可以做,陳太民主?開玩笑好啦。

    ReplyDelete
  5. If there was a market trading Mrs Chan and Mrs Ip's electoral chances,

    Mrs Ip should be a strong buy right now.

    *sigh*

    ReplyDelete