Wednesday, February 27, 2008

長實賣首都 敗露叛國心




噚日,因為一宗嚴重意外,「環保大道」出現交通癱瘓。孫柏文喺同事架車上,一早已經收到消息「環保大道」唔行得車。不過,同事照樣要塞入去,白白等咗一小時。

大家可能會問:「點解明知唔行得,都唔兜路?」唔兜路嘅原因,係因為「環保大道」係去《蘋果日報》總部嘅唯一條路。大家可能會繼續問:「你哋嘅總部係咪自成一國,所以得一條路去?」錯!「環保大道」係往返將軍澳工業村(上萬人返工)、長實新盤「日出康城」(幾萬人會住)嘅唯一條路。

首都在將軍澳

以噚日經驗,求神拜佛千祈唔好出現山泥傾瀉等會封路嘅事件,又遇上幾萬人當中同時有幾個人要call白車。真係冇咁多架直升機去救人。

點都好,橫掂要留喺車廂內,就不如做啲有意義嘅事。作為《金手指》嘅fan屎,你都知道我一向非常關注本地教育政策。特別係愛國教育。所以,我就把握機會打電話畀我八歲大姪仔 Louis,睇吓佢學成點。

電話接通之後,我就考吓Louis:「首都喺邊?」佢好快咁答:「將軍澳!」嗰一刻,我非常憤怒。Louis講緊嘅「首都」,就係長實新盤「日出康城」嘅第一期住宅。

我今日要好認真咁問長實,你哋究竟有冇將胡主席放喺眼內?

你哋係咪見Kosovo搞獨立搞得好過癮,所以就另起爐灶搞多個首都,為他朝港獨鋪路?

仲要知道班環保硬膠一定會繼續阻撓填海工程,添馬艦難起政府總部,所以索性遷都到將軍澳?

如果你哋成功搞港獨,第一個政策係咪想立法禁止用中文,人人都要用日文?強迫啲人接受「城中馬尺」呢個名?

其實「日出康城」呢個名已經敗露你哋嘅陰謀!揀「日出康城」個名咪就係你哋向東瀛天皇住嘅東京秘密地致敬!

買定防毒面罩

就是你哋呢種叛國心態,所以遭天譴。就喺你哋開盤銷售之前幾日,被各大傳媒大幅報道,往返「日出康城」只得一條好多垃圾車出出入入嘅路。最弊,你哋賣樓冇得押後,因為暖天氣一到,隔籬垃圾堆填區就會吹來陣陣惡臭。到時就算提供十一成按揭,都要減價一半先賣得出。幾日後想買「日出康城」單位嘅朋友,買定防毒面罩等夏天吧!真係好臭!

7 comments:

  1. 柏文兄:
    你可唔可以解釋吓點解政府:
    唔每月加三嚿水俾啲老人家?
    但係就萬萬聲咁送俾啲攞綜緩嘅。
    我真係唔明?

    係唔係驚佢地上街遊行(帶啲細佬仔)?



    註:六十五歲以上已無工作能力。
    攞綜緩嘅就有手有腳可以搵嘢做。

    ReplyDelete
  2. 柏文兄:

    我一向都好尊重你. 但看完你這編"長實賣首都 敗露叛國心" 隨筆. 覺得個心不太舒服.

    你想講比大家聽. 長實"首都"的不是, 你已句句到point 了. 我們也明白的. 最唔舒服的就是你講"港獨"的言論.

    一個地產項目"首都"....你都可以聯想到港獨.??????????

    你太厲害了.

    Wu

    ReplyDelete
  3. I AM SO forking angry today
    今日比 pccw (8)老屈
    已經打左去"一"周投訴!!!
    07年7月我係我老婆間shop到install左easywatch 諗住睇下有無仔行入來溝女,
    個sales faxed 左張contract 比我sign, 張fax 好唔清楚, 但我再問佢係咪一個月前notice 就可以uninstall, 因為我間鋪08年4月到期, 點知我尋日打比pccw, 佢話我仲有10個月約

    ReplyDelete
  4. to:frederickyu
    香港間間電信公司都係一樣。
    我之前裝NowTV,個Sales都話可以睇好多台啦,(英超,HBO....)。
    當我一簽約,就話可能溝通上有誤會,
    應該係好多台都無得睇之真。
    我打上去同佢講數,佢地就話合約精神。
    (簽咗唔可以cut),我打咗幾次上去,
    佢地先話幫我改台,但係只可以改一次。
    到英超開羅,先發覺只可以睇一個台(631)
    (一個星期一場)。

    最搞嘢係之後好多sales打嚟叫我加錢睇晒英超。我都係講同一句說話:之前你地話我個plan係可以睇晒。
    佢叫我自己打上NOWTV問,唔關sales事。
    跟住即刻收線!

    你知啦,平時叫佢地收線有幾難嗎!

    你打多幾次上去嘈佢地,
    可能有轉機!

    ReplyDelete
  5. to Wu:柏文兄小心走火入魔

    肥金: 我打左去一周投訴, 唔知比唔比果10個月佢好, 我問佢我唔比會點, 佢話先寄信, 再唔比就搵收數公司

    ReplyDelete
  6. 其實東方提過這個問題很多次

    既然將軍澳那麼臭,環保大到那麼多問題,為何蘋果還搬進去?作為蘋果人,你怎麼看呢?

    哈哈哈.....

    ReplyDelete