Thursday, March 27, 2008

任志剛延誤拯救負資產?

舊年之前,孫柏文聽過好多花旗國樓宇按揭嘅故事。聽過好多「乜話?佢都做到按揭買樓?」嘅故事。其中一個最離譜嘅例子,喺06年發生。聽聞,當時有個年薪1.2萬美元、摘生果維生嘅農工。佢零首期,成功借到錢,買到間70萬美元嘅屋。

大家可能會問:「月薪1000美元,可以零首期借五百幾萬港紙買樓?」冇錯,當時嘅信貸泡沫就係咁瘋狂。

雙失青年入市救市

大家可能記得,我曾經講過一種按揭,叫做NINJA按揭。即係解釋為借款人no income(冇收入)、no job(冇工做)、no asset(冇資產)。

咁嘅人,我哋特區曾經都有好多,我當年都係一個。不過我哋就冇叫呢類人NINJA,特區叫法就係「雙失青年」。

大家要知道,以前最多「雙失青年」嘅年代,亦係樓市最悲慘嘅時候。政府當年推出多項政策,希望推高樓市,不過都係失敗。我喺到諗,我「雙失」嘅年代,亦係花旗國信貸泡沫嘅膨脹期。點解我當時都係NINJA,但唔可以零首期買樓?

大家諗吓,如果當年啲「雙失」個個借到錢買樓,當年啲負資產就可以甩難。引進花旗國式嘅放債方法,唔係終極推高樓市嘅方法?點解啲薪高糧準嘅特區高官,冇行呢個政策?仲唔係失職?

利用外資穩定銀行

大家可能會話:「信貸泡沫嘅後遺症,就係銀行體制出現動盪。金管局總裁任志剛就係因為呢個理由,先至唔批准咁嘅放債方法。」

我話冇可能。任志剛咁醒,一定知道咁嘅放債方法,同佢嘅政策目標非常脗合。

大家要記得,任志剛想見到非常穩健嘅本地銀行體制。當花旗國嘅放債公司聯同啲投資銀行,為本港「雙失青年」向全世界撲水,本地銀行仲唔穩健?

因為可以借錢畀NINJA買樓嘅資金來源,一定係非理性。到時候收嘅利息,本地銀行根本冇可能競爭。所以本地銀行惟有撤出按揭市場,到時樓價大跌,本地銀行冇事。死,都係死啲外國資金。

最弊就係信貸泡沫已爆破。外國投資者已經冇機會經「雙失青年」、投資銀行將財富轉移畀我哋特區負資產業主。真係可惜。真係希望當年唔係任志剛阻住佢哋啲錢嚟,延誤拯救啲負資產業主。

3 comments:

  1. Pakman 呢篇野有少少語無倫次, 真係唔明你想講乜 ?

    ReplyDelete
  2. 唔明請參考三月二十六日有線財經資訊台的Money Cafe,柏文有詳細解釋。

    叫D countrywide、Northern Rock等在香港做D連香港銀行也不敢做的按揭,免供本吖、免入息證明吖...,即時抄起樓市,免却當時捱負資產咁慘...

    有事爆次按囉,這些都是外資按揭公司,唔關香港金融機構事...

    我估柏文這篇文章咁解...

    ReplyDelete
  3. the piece could have had better explanation...

    but yes. the 2nd anon nailed what I wanted to say...

    ReplyDelete