要搞3G？188個貨櫃救中移

噚日，特區股市嘅主題，肯定係中央重組中國電訊業。基本上，政策令所有電訊公司，做晒所有業務。間間都做流動電話、固網等嘅生意，即係全面重叠。

有咁嘅政策，肯定唔係曾特首、鄭家富或九巴前揸fit人陳祖澤諗出嚟。因為佢哋三個都親身感受過，全面計劃經濟帶嚟嘅喜悅，所以深信政府設立多個壟斷性機構瓜分市場。

曾特首、鄭家富就最鍾意「得番鐵路」政策，陳祖澤就希望政府可以更有效瓜分市場，等資源毋須重叠。如果佢哋三個人真正愛國，就應該放下一國兩制、河水不犯井水嘅包袱，大聲勸喻溫總理，即刻喝停今次會引嚟資源重叠嘅電訊業重組。

如果成功，就繼續要向中國石油業出力。因為中石油（857）做提煉、零售，中石化（386）擴大開採業務，中海油（883）走番上岸，三個成為全面競爭對手，業務重叠係浪費！

業務重叠陡浪費

如果溫總覺得要引入競爭，先可以提高效率，就係承認冇管治能力。佢老人家應該退位，畀曾特首、鄭家富或陳祖澤上位，因為佢哋掂！

不過噚日知道重組安排後，中移動（941）跌咗超過10蚊。睇牌面，中移一吞條鐵通，即刻腸穿肚爛。

好多人一路以嚟買中移，都係因為佢有太陽由東邊升起，西邊下山般穩定嘅上客量同盈利增長。大家驚嘅就係究竟電訊業重組後，中移GSM會否被割肉，同埋如果要走出3G呢個黑洞，究竟要燒多少錢。

硬食3G買唔過

我唔覺得重組會動搖中移流動電話龍頭位置，睇到3G有冇得搞，先至係之後幾年嘅重點。

我以前曾經推介過「一注獨贏買和黃（013）」，因為當時和黃3G推出 X-Series終極收費計劃，已經做晒電訊商可以做嘅嘢，去推3G。不過推咗X-Series七個月後，我見到和黃都上唔到客，就惟有撤銷「一注獨贏買和黃」嘅建議。因為3G唔得，唔係電訊商嘅問題，係手機嘅問題。噚日中移動跌咁多，就因為可能要硬食3G。

不過好彩救星到。上個禮拜，花旗國蘋果電腦，已經收到188個bill of lading寫咗electric computer嘅貨櫃，應該就係3G iPhone。我自己用過iPhone上網，只可以話，如果iPhone都唔可以令人大規模用手機上網，咁就冇手機得。可能就係蘋果電腦救中移。