Thursday, May 22, 2008

做局長老婆要辭職?

前日,政府宣佈新一批副局長人選名單。噚日孫柏文講過,政府只係平均用咗150字去介紹啲副局長。所以我哋作為傳媒,就可以為啲副局長喺大家心目中塑造「第一個印象」first impression。

噚日,我講過環境局嘅潘潔女士。話佢嘅環保方針,應該用「西瓜膠」嚟形容。出面綠色,裏面紅色嘅硬膠。未來,本欄將會以「西瓜潔」嚟稱呼潘潔副局長。

我亦講過民政事務局嘅34歲許曉暉。話政府用150隻字講佢過去嘅功績,居然要「填窿」,連佢喺邊度讀過,啲有錢就可以讀嘅幾日課程,都要用埋。許曉暉個樣,確實同我一樣,比真實年齡成熟得多,好似經歷過好多事。最弊「經歷過好多事」呢樣嘢,只係個樣,唔係功績。未來,本欄會以「熟女暉」稱許曉暉副局長。

今日,我要為運輸及房屋局副局長邱誠武辯護。佢係《經濟日報》嘅執行總編輯,仲係86年「最佳記者」(see pic and caption),佢老婆就係《明報》投資理財版負責人,金童玉女。不過,因為邱誠武將會管啲有上市嘅運輸企業,而佢老婆因工作關係,又同嗰啲企業嘅管理層「好熟」,所以我噚日聽到有人話,咁樣有利益衝突。就係因為有咁嘅指控,我就要為邱副局長辯護。

各人都有職業操守

首先,只不過因為兩個人有老公、老婆嘅關係,唔等於啲人即刻忘記自己嘅專業操守。香港有咁多夫婦,同時都有自己嘅career,一旦老公任局長,老婆就要辭職,咁樣對任何局長嘅配偶都唔公平。

如果一定要配偶離職,一個人先至可以做局長,願意接受咁嘅安排嘅人,你覺得佢嘅品格配得起做局長咩?不如咁樣諗,經過呢篇文之後,邱誠武同佢老婆知道傳媒會睇實。多都唔講,一旦出事,《明報》將會誠信破產,所以就算我唔睇實,《明報》啲股東都會睇實。

最後,花旗國有對夫婦,老公叫做James Carville,老婆叫Mary Matalin。兩個都係選舉政治顧問,不過一個共和黨,一個民主黨。1992年,佢哋不但為自己嘅黨出盡全力去擊敗對手,仲要喺總統選舉戰面對面對壘。兩個花旗國總統可以信夫婦能夠尊重職業操守,唔通你唔得?

Says who you ask? As anointed by god himself of course.

11 comments:

  1. 獲任的葉根銓 (財政司長政治助理)個樣老餅到爆,38歲,張相看上去有成四十到尾咁..
    喂喂..孫生,,我想問呢d獲候任人士的女子,佢地結了婚未呢

    ReplyDelete
  2. 見許曉暉的樣,再知道埋佢的年齡,佢簡直老餅都爆,佢結了婚呢..如冇.咁有冇拍拖呢..
    成個"詩拉" , 賺咁多錢都唔識keep o既,
    視覺no way, 做野如何.. 咁就要放長眼看看啊

    ReplyDelete
  3. 葉根銓 is a nice man. One that could be reasoned with.

    As for 熟女暉, I was merely trying to raise the point of her 'experience desperation' .

    ReplyDelete
  4. 今日生果報的左丁山專欄講熟女暉原來已結了婚,还係個年輕媽媽啊

    ReplyDelete
  5. 您們有點口德可以嗎?

    您們稱呼許曉暉為"熟女",似乎人身攻擊吧?
    您們日後可以評論許小姐的工作能力,但不應品評許小姐的外貌吧!

    要謹記:許小姐並非參加選美啊!

    同一道理,孫先生您也不想別人稱您為"中坑文"吧?我們讀者尊重您的見解和評論而來此blog看您的文章,當中也全沒在意您的年歲、外表。

    這年頭靠的是實力,正如孫先生您一樣。靠的也是實力在財經口水界穩佔一席。又不是演藝界,靠外表揾飯食 ...

    一個路過但不認識許曉暉的人

    ReplyDelete
  6. 話佢"思拉" "成熟" "熟女",
    我唔覺得有人身攻擊喎..!?
    話人豬扒,樣衰呢d先惡意批評.
    話佢"思拉" feel, 成熟型, 熟女 型有o羊問題喎.

    如有人咁講我,我唔介意喎,
    起碼讓自己檢討下改善外表,
    最好有人可以comment我的外表

    我唔覺pakman和其他讀者有惡意的批評喎.

    ReplyDelete
  7. pakman

    我支持你.
    d人一d comment都唔接受的..
    pakman你要keep住你一貫的作風,
    即管放馬去講..
    永遠支持你的讀者

    ReplyDelete
  8. 話人"熟女"同"豬扒"有セ分別?咪有係人身擊!阿媽生你個樣醜D或成熟D,你有得揀咩?

    你唔介意,點知許小姐不在意呢?

    既然許小姐是出來為香港人做事,若然是批評許小姐的工作能力,絕無異議。如挑剔的是無關工作能力以外的事,就...;這不是一點批評也不接受。

    這也並非不支持孫先生,所有到此一遊的人也或多或少支特孫先生。只是許小姐有女兒,有丈夫,有家人,可否顧念其家人感受?若有人對許小姐的女兒,稱其母為"熟女",你估無品既係叫人"熟女"的人?還是"熟女"呢?

    孫先生文筆辛辣、風趣、過癮;不容置疑,相信以上講者所言,是愛之深、責之切的言語;也是出於愛護孫先生的心

    ReplyDelete
  9. 本身自己個樣貌都係生得成熟老餅,
    我唔介意人地話我係老餅一族,熟女x
    根本你就係小氣,
    看你咁為熟女暉defend,
    初時比我感覺你應該係識她的,
    現在看你咁為佢defend,更加另我懷疑你係佢的親朋戚友之類啊....
    又唔咪話佢樣衰,都唔明點解你咁小氣..
    完全冇容人之量,
    由細到大都比人話係老餅一族,又如何喎..?

    ReplyDelete
  10. 我唔mind人地話我成熟老餅,我d 朋友都話我個樣好q 成熟,佢地仲叫我千奇唔好短頭髮和電髮,唔咪會更加老餅,所以別人對我的外表comment,我絶對唔介意,咁仲好,可以讓我檢討下自己的外表...

    ReplyDelete
  11. 成熟唔緊要,不過最好識 "質" 下自己外表,
    都唔明點解d人咁激動,方唔咪識得許小姐.

    ReplyDelete