Monday, May 19, 2008

挺挺曾 走多步

過去呢個禮拜,孫柏文只能感受到揮之不去嘅沮喪。四川地震已經過咗一個禮拜,救災工作第一階段,亦因時間被迫中止。中央政府因而面對,對佢哋救災取捨決定嘅第一個挑戰。

記得當年911發生後,所有花旗國電視新聞台,每日24小時不斷從雙子塔附近報道最新消息。由發生當天,救援員盡忠職守嘅反應,到之後陸陸續續「奇迹地」搵到生還者,同見到花旗國人民慷慨、團結嘅反應,都係災難黑暗中嘅一道曙光。

行動中止希望終結

不過,911發生之後大約一個禮拜,新聞台突然報告,話在場嘅警員同消防員發生暴力衝突。原來,當時政府決定,埋喺瓦礫下生還者嘅生存機會近乎零,為免疫症爆發,命令警員清場。眾多紀律部隊當中,最多同袍困喺雙子塔裏面,就係消防員。當拯救行動仲喺進行當中,都仲有一線生機。當拯救行動中止時,亦代表希望嘅盡頭。

今次四川地震,已到同一階段。就算理性覺得要中止,作為父母、子女、朋友,又有誰能夠放棄?

講地震講到非常沮喪,不如講番特區。特區政府最近放寬咗外國留學生嘅留港限制,方便佢哋搵工。孫柏文非常支持政府咁做。不過,孫柏文始終覺得,政府唔應該局限本地大學嘅留學生,應該連外國大學生都可用同樣方式來港搵工。因為本地大學始終都係政府搞晒,唔係話唔好,但係教出嚟嘅大學生就算唔係一樣,都好有可能係差唔多。

標籤係特區教育DNA


用牛扒嚟做比喻,特區學生就好似entrecote。Entrecote雖然係高級,但係始終都係同一個cut,唔夠多元化。所以我都係覺得,應該畀外國例如100間「最好」嘅大學學生嚟特區搵工、創業。到時候有entrecote,又會有filet mignon。

大家會問:「『100間最好』嘅外國大學?點揀先?咁咪會有好主觀、唔公平嘅標籤?」自從97年一役,特區政府主觀咁將中學標籤為「可以用英文教」同「唔可以用英文教」,標籤呢樣嘢已經係特區教育嘅DNA,想搣都搣唔甩。

其實,多個始終好過少個,畀佢哋嚟又有乜所謂。所以挺曾走多步,等外國大學嘅filet mignon都可以來港「做好呢份工」!他朝做埋香港人!

1 comment:

  1. 都5係嘅.......港,中,科大都有DAgrade嘅學生嘅.....

    佢地揾5到工,點還債呀.........^^"

    ReplyDelete