金手指貼士第二季總結

7月第一個交易日，係時候總結金手指篤過嘅「一注獨贏」貼士。可以用以下16個字做總結，「油價大上、油股好弱，黃金白銀、唔上唔落」。以下就係08年第三季嘅展望。

買白銀保購買力

白銀：自從3月大上跟住又大落之後，白銀雖然波幅頗大，不過只係微升幾毫子美元。第二季收報17.51美元一盎斯。其實，世界各國嘅銀行撇賬活動，已經進入第四季。每一次大幅撇賬，都要引入新資金。由中東、祖國、新加坡等嘅羊牯，都相繼試過中招，入股後睇住股價比入股價位一浪低於一浪。

有啲例如平保（2318），早前入股富通銀行之後，因為已經洗濕咗個頭，富通再要供股時，為保股權百分比，平保又再要泵水。問題就係天下羊牯雖然多，不過始終都會有用盡嘅一日。一旦再冇羊牯，又遇上啲中央銀行自己冇錢，啲國際級銀行又再風起雲湧。

到時候會否發生悲劇式嘅骨牌倒閉潮，就真係唔知囉。就算唔發生，中央銀行又再次相救，只要出現「要救」嘅情況，世界股市將會再出現動盪。大家要謹記，87年股災當日，花旗國股市得一個板塊升，就係金礦股。

孫柏文都未講世界爆發嘅通脹危機，令各地嘅有錢佬各出奇謀，去保護自己手上資產嘅購買力。所以有錢繼續買，一定冇後悔。作為白銀戰隊隊長「白銀文」...

維持原本建議：強力買入。
目標價：120美元一盎斯。
有效期至：2016年3月6日。



料中油可貼國際市價


中油香港（135）：如果半年前，你同我話一桶油價會六個月之內升40%，我會話你儍。如果你話油價升40%之後，冇下游業務嘅中油香港股價仲要跌差唔多30%，我會話你唔好當我儍。

不過現實就係咁。原因就係中油嗰兩個大陸油田開採出嚟嘅油，07年售價俾人gum住嚟搶。不過好處就係當07年俾人搶錢，08年只要搶錢情況冇惡化，大陸項目貢獻嘅盈利就會穩定下來。

而因為中油香港啲海外項目，賣油嘅價跟國際市價走，不但可以彌補大陸項目嘅倒退，仲應該可以推高中油總體利潤。等到半年業績出時，再作檢討。

維持原本建議：強力買入。
目標價： 8.05元。
有效期至：2008年10月24日。