三十年前 奸商名單

上星期，商務及經濟發展局局長劉吳惠蘭女士為佢嘅「逢商必奸」言論作解釋，透過新聞秘書話佢當日嘅言論只係憶述三十年前嘅世界，而今時今日社會環境已經唔係咁。

孫柏文睇到，知道唔係講緊我，因為三十年前我仲未出世，所以對於佢嘅澄清都收貨。

今時唔同往日

不過，作為一個一向關心別人感受嘅人，我將自己代入三十年前劉吳惠蘭嘅處境，嘗試扮演佢，幻想自己係三十年前二十幾歲、啱啱港大畢業，走去大學嘅就業介紹處，搵個adviser指導吓嘅經驗。

去到坐低，個adviser拎住叠資料同劉吳惠蘭講：「以你嘅成績，應該好多大公司爭住請你，係你揀工而唔係工揀你。」於是對方就叫劉吳睇吓啲資料，點知一見間公司個名，就諗起間公司嘅負責人，繼而諗起佢嘅奸詐、不擇手段嘅邪惡。劉吳惠蘭逐張逐張公司簡介拎喺手，對住個adviser講：
「滙豐銀行，沈弼，奸。
太古洋行，Swire，奸。
怡和洋行，Keswick，奸。
和記企業，祈德尊，奸。
中電集團，嘉道理，奸。
東方海外，董浩雲，奸。
新鴻基地產，郭得勝，奸。
長江實業，李嘉誠，奸。
九龍倉，包玉剛，奸。
電視廣播，邵逸夫，奸。
新鴻基證券，馮景禧，奸。
東方石油，霍英東，奸……」

幻想完後，孫柏文嘗試用計數機計吓，以上公司三十年來交稅養活好似劉吳惠蘭呢啲咁嘅公務員嘅款項有幾多，不過因為小弟嘅計數機只係得12個位，當然計唔到啦。

於是我又諗，當時以阿惠蘭嘅激情抱負，冇理由唔叫啲同學唔好加入商界，以免助長奸險商界的歪風，成為邪惡勢力嘅幫兇。作為金手指嘅fans，如果你係劉吳惠蘭當年嘅同學，不妨電郵給我，分享吓佢當年點樣用佢嘅魅力同感染力，成功說服你放棄從商、進入私人機構嘅道路。

經濟神話之形成

最後，我想知道，讀者之中有冇一啲係以上提過嘅公司嘅後人，如果你係，你係咪好應該企出嚟，對劉吳惠蘭話你上一輩、三十年前通通都係奸商作出回應。唔講不但對你祖輩唔公平，而係對嗰一代將香港變成經濟神話，令我哋今時今日有機會嘅後輩唔公平。求求你哋，出聲吧！

We can't let this stubborn, self-righteous, ungrateful, unrepentant bitch get away with this。