世界末日的黎明

孫柏文唔知點講，先至可以完全表達我現在心裏面嘅恐懼。花旗國又傳來新聞，話有按揭公司出事。由舊年開始，相信大家聽到有按揭公司出事，到今已聽到厭。

不過，今次嗰兩間出事嘅按揭公司房利美同房貸美，唔係以前嗰啲出事金融機構，Bear Stearns拍埋嗰兩家公司，根本就係一條紅衫魚同鯨魚嘅分別。

Bear Stearns被收購時，資產、負債約幾千億美元。房利美同房貸美約1.4萬億美元，兩個保證「一定會還款」嘅按揭債券，總數5萬億美元。祖國國民生產總值，只不過係3.25萬億美元。

佢哋可以做得咁大，係因為市場覺得佢哋係政府搞出嚟，出事會有政府救。變相令佢哋有如政府借錢一樣安全，借錢利息同政府差唔多。

不過因為係政府搞出嚟嘅機構，次按風暴爆發時，其他金融機構放棄按揭業務，花旗國政府就叫房利美同房貸美做多啲按揭。佢哋嘅市場佔有率，喺08年第二季應該超過七成。唔好講話佢哋倒閉，淨係唔做新貸款，花旗國樓市就會完全停頓。大家估吓年尾一個一個由中國出發，載滿消費品嘅貨櫃，到花旗國時會點？

無可否認，就係佢哋兩個都係資不抵債，如果執笠將資產拍賣，債權人攞唔番晒啲錢。股東？輸清光。當然，一間公司可能資不抵債，但真係要宣佈倒閉，係要有債到期，公司還唔到先至會宣佈。

保護自己要買黃金白銀

房利美同房貸美1.4萬億美元嘅負債當中，有約20%係短債。佢哋要不斷借新錢還舊債。今晚，房貸美將會發售新債去借錢，唔好話賣唔出，淨係如果要畀嘅利息拉高，就等於市場覺得佢哋冇政府救。喺街邊嗰5萬億美元、由佢哋保證嘅按揭債券，價格就會完全唔明朗。

聽聞，祖國政府都借咗3700億美元畀房利美同房貸美，我絕對相信，今晚花旗國開市前就會有措施。如無意外，聯儲局嘅 5000億美元孭唔起，要政府孭起佢哋嘅債。

大家可能會話：「咁咪雨過天青？」花旗國政府國債9萬億美元，一夜之間加5萬億美元，你覺得政府本身嘅風險又會點？冇錯，如果將會濫發鈔票去還錢，美元會跌，國債利息升，上個禮拜五就係咁。

求求大家，一定要保護自己，買黃金同白銀。