劉吳惠蘭 — One ungrateful bitch

早幾日，孫柏文聽到收音機一段講話，聽到時令我有作悶作嘔嘅感覺。一段收音機、電視台講話令我有咁嘅感覺，97年回歸之後只係試過兩次。
第一次就係98年，我喺香港聽收音機話政府宣佈入市，大舉購買股票托市「去擊退外國炒家」。
第二次就係03年，聽到當時嘅保安局局長葉劉淑儀話：「希特拉都係民選出嚟。」

對上兩次，除咗作悶作嘔嘅感覺，腦中就不斷不停咁諗：「唔會啩？唔係真係香港嚟啩？我哋究竟發生咗乜事？我哋點解搞成咁？」不過已經過咗五年，我人都過咗三十，句說話就算心痛，都應該已能抑壓身體機能反應，原來仲未得。

商界好奸好凶險？

早幾日再次令我有咁嘅感覺嘅講話，就係取代辭職離任嘅馬時亨，新任商務及經濟發展局局長劉吳惠蘭。佢喺電台話：「從冇諗過入商界，商界好奸，商界非常凶險，為咗錢可以你爭我鬥，不擇手段，當人係賺錢機器，無人受到尊重。」

香港每一個喺私人機構做嘢嘅人；
每個每日返工放工，都喺度製造其他市民需要嘅產品同服務嘅人；
每個每日千方百計，盡量希望自己賣嘅嘢，更能滿足市民需要而擊敗對手嘅人；
每個每日辛辛苦苦滿足市民需要，有回報之後，畀政府抽稅嘅人，劉吳惠蘭講緊你。

孫柏文今日想提醒劉吳惠蘭，我有份養你。
我每日要冒住被廣大讀者、網友抨擊嘅風險去養你。
我要申請稅務貸款去養你。
你真係咁同我講嘢？你唔係嘛？You truly are one ungrateful bitch。

公務員系統腐敗

我知道劉吳局長手上最棘手嘅問題，根本唔係「香港電台」問題，其實係要聽隨歐盟啲鬼佬話，為香港通過競爭法。如果因為咁，你講咗以上嘅說話，你就係「葉劉淑儀2.0」。

喺03年，我曾經安慰過自己，一個可以升級再升級嘅香港公務員，冇可能講得出「希特拉都係民選出嚟」嘅說話，冇可能真心相信呢樣嘢嘅人，可以通過我哋香港公務員系統嘅甄別，俾人揀為「人才」。葉劉淑儀可能係「無間道」，諗出呢個終極方法，去推倒23條立法。

我真係太天真，葉劉唔係「無間道」，原來公務員揀人才嘅系統，就係咁腐敗。