拋空係衰人咁買入呢？

呢幾日，見到全球各地好多人都問呢個問題，所以孫柏文都想同大家分享。相信大家都知道，上個禮拜花旗國證監會宣佈推出新措施，令包括「兩房」合共19隻金融機構嘅股票，更難被投資者拋空。

業績公佈金融股把脈

問題就係美證監咁做，即係覺得拋空金融股係錯，拋空嘅投資者就係衰人。
咁係咪買入金融股就係（至少道德上）聖人？
如果買入唔拋空就係聖人，咁點解買入唔拋空石油，就會俾人鬧到仆街？

大家千祈唔好笑花旗國，話佢哋缺乏邏輯。喺特區，大手買入人民幣？有人會話你係邪惡美帝大炒家，一個熱錢團隊成員，想興波作浪破壞祖國經濟穩定。
不過你試吓掉轉頭沽爆港元同時拋空港股？就會有官員用納稅人（即係我哋）嘅錢，體罰你。到十年後嘅今日，該官員仲會喺外國記者前話自己好叻。不過對官股入市後，因為冇晒街貨，所以經紀業成交額暴跌，完全冇悔意。

相信該官員睇蝙蝠俠新片，會覺得出奇，喺特區上空飛嚟飛去嘅蝙蝠俠唔係打煲呔。我話出奇嘅係，點解個Joker唔係打煲呔。This city deserves a better class of bureaucrats。

講番個市。花旗國又到業績公佈期，即係對於佢哋啲金融股嚟講，又到把脈期，能夠被把脈嘅先決條件，就一定先要有脈搏。咁好多金融股嘅股價，喺早排有某程度上反映倒閉嘅危機，點知未死得，拋空咗嘅投資者都要畀畀面平倉。

兩房債券有政府保障

雖然有脈搏，但個市仲係好病。雖然仲未講出口，不過「兩房」嘅債券應該有花旗國政府百分之一百嘅保障。可惜房利美嘅債券，相對國債有越來越大折扣。全球最大嘅債券基金 PIMCO，已經一早落重注買國債同「兩房」債券嘅息差收窄，現在輸緊錢，唔知會唔會老貓燒鬚。大家都係小心行事。