Sunday, July 13, 2008

分析員如何推低股價

兩日前,孫柏文同大家分享過,對於呢排股市有被分析員主導嘅感覺。班分析員只係將大家一早知道嘅事實,再重複吓,就令個別公司嘅股價大上大落,亦提供咗「分析員主導市,最難炒」嘅結論。唔似大家可以同時間作反應嘅「新聞主導市」,因為除非你係啲分析員肚裏面條蟲,根本唔會知佢哋又會幾時講嘢。

不過問心嗰句,點解會變成咁?點解啲分析員嘅威力「忽然」大咗咁多?兩日前我推斷係因為「權威肯定咗之前已經知嘅嘢」。不過噚日朝早睇完CNBC嘅Jim Cramer後,就發覺我雖然冇錯,不過就漏咗啲嘢。

樓市向下陰乾股價


噚日Jim Cramer攞咗幅走勢圖出嚟,上面條線代表咗佢發明嘅「被花旗國樓市爆破影響嘅公司」指數。指數就係以地產發展商、銀行、股票行、投資銀行等公司股價組成。

由舊年8月指數出現時嘅100點,到yi家已經跌到20點。而佢話平時股價郁,係因為有新聞、新消息。不過呢啲「被花旗國樓市爆破影響嘅公司」,就喺 silence寂靜中,股價慢慢俾陰乾。

「寂靜」都能夠陰乾股價,係因為大家都知個大勢係點。花旗國樓市不斷下跌,銀行手上資產不斷貶值,所以銀行嘅資金受到壓力。而如果啲銀行要發新股集資,股價就盡量要高,所以就要扭轉現有嘅跌勢。

如果「寂靜」令股價跌,佢問,究竟啲公司管理層去晒邊?點解不斷有負面分析,啲管理層都唔交代?我嘅簡單答案就係,呢啲管理層已經誠信破產。喺講乜都冇人信嘅情況之下,又點會講嘢?

管理層誠信破產

佢繼續問,究竟啲官員去晒邊?我諗啲官好難話:「之前睇錯,其實好大鑊」。不過我會話,我卒之明白點解呢排個股市被分析員主導。因為根本冇新聞。

例如,平安保險(2318)要再注資富通銀行,有冇平保嘅人,高姿態、有信心咁交代?一張新聞稿?唔好玩啦!

又或者港交所(388),有冇管理層講吓有乜鴻圖大計,可以令股價上番250元一股?
滙豐(005)有冇人交代吓英國業務情況?

大家都係希望,可以輪迴做分析員肚裏面條蟲算。

3 comments:

  1. Pakman, 聽你咁講. 是否2318, 388, 5 都不值得買. 繼續下跌.

    ReplyDelete
  2. Thanks.

    除重注金.銀外. 可否重注埋
    2318 和 3968?

    請指教.

    ReplyDelete