港稅不上繳的原因

呢個周末，孫柏文睇電視見到一眾立法會議員北上四川。睇到佢哋走去視察吓，究竟特區政府要求撥款100億元，會攞嚟做乜。

其實作為一個政府，有啲界線係不能過。甚至乎踩界都會非常危險。呢次特首曾蔭權要求撥款畀四川，就可能過咗一條咁嘅大底線。

呢條底線係乜？當年，鄧小平收回香港，佢知道我哋香港人對好多嘢都擔心。唔好話政治動盪，帶嚟文革嗰種對生命同身體嘅威脅，淨係話政府要「共大家嘅產」都一定會令好多人即刻走。

政府攞市民財產嘅方法，就係抽稅，不過大家香港人，都好明白政府有啲錢一定要使，例如請差佬維持治安，請法官等大家可以打官司等。鄧小平知道抽稅同政府使錢，一定要令大家服，所以呢條就係嗰條底線。

一定要知錢嘅去向

「服」即係點解？即係政府攞香港人嘅錢用時，要清清楚楚。政府用錢，有用絕對ok。政府嘥錢，我哋唔會鍾意，不過都可以算數。我哋不能接受嘅係政府攞咗我哋嘅錢，跟住喺大家唔知道點樣用咗嘅情況之下，冇咗。

鄧小平明白，香港人要完完全全知道政府啲錢係點用。一但衍生一個機制，香港政府點用錢冇人知，特首同官員輕則浪費，嚴重就會出現貪污情況。到時候香港人唔「服」，一齊走，香港即時玩完。

鄧小平有自知之明，知道大陸共產黨領導之下嘅各級政府，講畀市民聽點用錢嘅資訊，比較少，未能達到香港人要求嘅標準。

如果大陸各級政府要攞香港人嘅錢，有「要中央撐腰先得」嘅特首，同被「愚忠扮愛國政客」充斥嘅立法會護航，香港人一定會畀。

不過因為使錢使得唔清楚，香港人（例如《蘋果日報》）一定會問好多問題。問得多，又會被人標籤為「反中亂港」。最後香港人惟有啞忍，心裏絕對唔「服」。

所以預見及此，為了避免分化港人，鄧小平一刀切，要求香港政府抽稅返嚟嘅錢，唔可以喺大陸用。如果當時你覺得鄧小平唔要香港人嘅稅，係想「益」香港人，你根本唔明白佢嘅用心。

曾特首今次踩過界

問題就係，曾蔭權想畀四川一百億，就係踩界。好在仲有范太明白鄧小平，識得問：「唔係100億或200億嘅問題，畀幾多可以慢慢傾，不過點使先？」曾蔭權今次挑戰鄧小平嘅智慧，究竟為乜？如果真係為政治化妝，曾蔭權真係過晒底線。唔會係嘛？