小小超為媾女？為搵銀！

今日未入正題之前，孫柏文想講吓究竟個股市喺7月呢刻，係咪會好似1月同3月一樣，又係入市博反彈嘅良機。相信大家都知，1月恒指跌到21700點附近之後，就彈上25200點。3月就從20500點，升番上26300點。

因為兩次機會，捕捉得到，都會非常肥仔。所以大家都應該同我一樣，睇吓呢一刻嘅情況，係咪同上兩次一樣。我可以話：「絕對唔係。」大家可能會話：「1月就有法興出事，3月就Bear Stearns，今次有房利美同房貸美。如果個市要極度悲觀先至彈，睇落似層層。」

如果你咁諗，你就會輸錢。我覺得太多人有錯覺，1月同3月個市反彈，只因個市極度悲觀。今日，我就要糾正呢個謬誤。

聯儲局頂唔住

1月股市見底，唔係因為法興出事，反彈全因聯儲局減息0.75厘。重藥。3月股市見底，唔係因為Bear Stearns倒閉，係因聯儲局放寬「可接受泵錢機構」名單。除咗商業銀行之外，就連投資銀行或孫媽媽都可以接受泵錢（當然，孫媽媽嘅負債程度，要高達千百億美元）。不過都係重藥。

今次最弊係花旗國財長話要國會出手先得，因為聯儲局嘅5000億美元資產，頂唔順「兩房」萬億負債。大家試諗吓，如果有特區金融機構出事，連任志剛都話搞唔掂，要靠我哋60位尊貴立法會議員去解決，你話係咪見底入市博反彈嘅良機？

入正題。噚日我喺本報娛樂版見到則新聞，令我感受到小小超嘅智慧。今次「兩房」出事，連同金融業嘅危機，有好多聰明人已經話，花旗國最壞情況可能會同上世紀30年代大蕭條一樣咁衰。

夢工場現生機

當年當然百業蕭條，不過花旗國就有一個行業做得好好，呢個就係電影業。之前有人解釋，當時啲人睇荷李活電影，喺昏暗嘅電影院裏，可以令觀眾有幾個小時忘記真實世界嘅煩惱，所以大蕭條嘅電影業先咁蓬勃。

其實今時今日，睇吓蝙蝠俠新電影破晒紀錄嘅預售票情況，花旗國電影工業可能就算有盜版同其他娛樂嘅威脅，都能重拾雄風。

有需求，不過有冇供應？早幾日，派拉蒙電影公司同德意志銀行，宣佈集資4.5億美元失敗，德意志仲宣佈連為電影集資嘅部門都會關閉。所以可能有需求，少供應。

大家覺得小小超搞電影係為咗媾女，其實中咗煙幕。當年都係話搞高科技做煙幕，其實搞地產搵真銀，今次令人覺得係媾女，之不過想你冇戒心。

小小超真係勁！