「慘過八萬五」兩周年紀念

花旗國禮拜二東岸時間下午兩點半，一名53歲女業主傳真咗張fax畀佢嘅按揭公司。Fax上面話：「到今日你哋收樓時，我已經會唔喺世上。」嗰日嘅下午五點，按揭公司其實已安排咗人去收女業主嘅樓，亦安排咗即時進行銀主盤拍賣。

喺下午兩點半，收到女業主傳真時，按揭公司已即時報警。到下午三點半，警員到達現場時，已經發現該名女業主，吞槍自殺。到下午四點半，原先安排咗嘅拍賣時間前半小時，當有興趣嘅買家陸續到達現場時，女業主嘅屍體仲喺間屋裏面。樓價大跌，生靈塗炭。

預言今日實現

今日同大家講呢場悲劇，孫柏文係抱住最沉重嘅心情去講。呢個世界，好少嘢慘過睇住一場已預見、可避免嘅悲劇，好似有劇本一樣，一步一步咁發生。

06年嘅今日，小弟寫咗篇題為「花旗國樓市將慘過八萬五」嘅文章。文中最後話：「花旗國有好多人買樓係做盡按揭，所以就會好快有一浪一浪嘅負資產出現。銀主盤湧現、破產人數急升、有人自尋短見令到生靈塗炭，特區人民見過，花旗國人民亦將會感受得到，祝佢哋好運！」06年嗰日啲人對篇文嘅反應，可以形容為「比欠佳差少少」。

到07年嘅今日，我又自我檢討咁攞篇文出嚟，同大家話：「今時今日，因為花旗樓市又真係未慘過『八萬五』時代嘅特區樓市，所以我在此承諾，出年今日，我會再檢討。」

到咗08年嘅今日，都唔使我再講，你哋都知道係點啦。

漏洞不斷發生

其實，當年特區嘅八萬五政策，殺傷力最大唔係純粹嗰個政策本身，而係八萬五代表一種管治模式、政策大方向，八萬五本身只係其中最嚴重嘅症狀。

情況好似「次按」唔係花旗國樓市泡沫膨脹、爆破嘅根源，只係症狀一樣。泡沫膨脹嘅根源，就係聯儲局為首嘅「紙幣狂魔」，同各級銀行、金融機構，發現貨幣制度、信貸評級、證券化嘅漏洞。重複又重複咁屈機，將全球信貸供應瘋狂咁膨脹。

泡沫爆破時，悲劇。

Appeared 25th of July 2006