「下一個係」雷曼兄弟

早幾日，孫柏文同大學同學「左翼banker」食晏。大家唔好誤會，我叫佢做「左翼banker」嘅原因，唔係因為佢冇支持計劃經濟，而係因為我哋讀大學時，踢波佢踢左翼（佢速度快、交波準），我踢前鋒（盡量減低累後防輸波嘅可能性）。畢業後，我哋一路都有保持聯絡，不過可能科技太發達，早幾日係十年嚟第一次坐低食晏。

不得不提，左翼banker除咗係我舊同學之外，同時都係 Bear Stearns嘅舊僱員。大家都應該知道，Bear Stearns喺三月冇咗。當時，由百幾美元跌至10美元一股嘅作價，被JP Morgan收購。

賤賣資產有原因

佢現在已離開之前嘅工作單位，準備為新公司效力。不過之前嘅工作單位，就要佢有冷靜期，嗰日食晏，左翼banker就叫冷靜期做gardening leave。雖然一個好似佢咁嘅banker搵埋唔少，不過喺呢個石屎森林，啲番鬼銀行就應該改改用字，冷靜期唔好叫做gardening leave。當種盆栽都未有位，唔好話花園啦。

不過嗰日講到Bear Stearns點解冇咗時，就見到平時冰般冷靜嘅佢，有少許激動。開名鬧花旗國財長Paulson，話佢賤賣資產。原來，有對冲基金肯出幾十蚊一股作價，去收購Bear Stearns，不過統統都被Paulson否決。

左翼banker估Paulson係因為98年，諾貝爾得獎者坐鎮嘅LTCM對冲基金爆煲時，Bear Stearns唔肯出手干預，想市場自由運作，所以先至被針對。佢繼續話，就算賣唔出，就不如一拍兩散，將Bear Stearns清盤，債權人慢慢計算資產價值。

業務萎縮埋伏線

佢話就係咁，所以對Bear Stearns末代CEO係完全滿意。我同佢講：「一拍兩散？之後個末代CEO點樣仲搵到工？投資銀行家為銀行股東？我成日都話，要靠投資銀行搵錢，做客戶、股東都唔得，惟有做員工。」

最後佢話，雷曼兄弟已將業務大幅萎縮，亦都以「下一個係佢哋」嚟形容雷曼兄弟。究竟「下一個係佢哋」點解？大家自己諗諗。