呢排，我哋特區各大報章嘅財經版，都一路有報道關於電訊盈科PCCW大股東賣股嘅新聞。首先，孫柏文想問大家，究竟仲有乜嘢古仔比電盈更yesterday、更out？講真嗰句，我哋特區市民同股民對電盈呢間公司啲古仔已經聽到好攰，可以話筋疲力盡。
邊 個邊個賣盤賣股？又邊個邊個走去買？買嗰陣時點樣借錢？問邊個借？慷慨借錢嘅人又有冇控制權？如果今日個買家只係一名泊車仔，「終極」買家係邊個？「終 極」買家又想點同點解買？甚至今日個買家問人借錢究竟有冇特登講大話或隱瞞真相？如果有特登講大話，點解港交所同證監會好似碌木咁？如果冇特登講大話，點 解港交所同證監會都係好似碌木咁？喺港交所同證監會返工班「千方百計、為求自保（今日同明日飯碗）」嘅人，究竟佢哋部印特權狀嘅印機刷，印到出煙未？呢啲 問題，甚至呢啲問題嘅答案，畀我哋特區市民同股民聽到，都只會擘大個口「打呵欠」。頂多學我朋友Rapiere咁問一句：「Who fxcking cares？」
因為好似班做心理輔導嘅朋友話齋，我哋特區對1186又好，對8號又仔，已經某程度上有closure，或者俗語話齋「睇得開、睇化咗」。不過講真，雖然我哋對電盈冇乜興趣，孫柏文相信我哋真係好想知，究竟李澤楷同佢老竇之間what has happened同what's going on？當然，孫柏文唔係話李澤楷欠咗我哋一個交代，因為兩父子嘅嘢，始終都係佢哋嘅嘢。
邊個仔未試過頂撞老竇
不 過，如果李澤楷當年做咁多嘢，例如攞數碼港令股民瘋狂賠上千億，原因唔係為錢，又唔係為國家做事，而係要證明畀老竇睇「一定要讀完大學先至可以出頭」呢個 conventional wisdom傳統智慧係錯，咁都最好同我哋講吓。兩父子，個仔搞啲嘢出來，事前老竇叫咗佢唔好做，個仔唔聽，最後個老竇要出來「解決」個仔根本唔覺得係 「問題」嘅「問題」。有邊個未見過？之不過今次，有成千上萬嘅人、成億上兆嘅錢，一齊同李澤楷走過路，我哋就算冇權知，都應該睇在我哋為你流過咁多眼淚嘅 份上，出嚟同我哋講。試問，一個仔特登做啲嘢去頂撞老竇，有邊個做仔嘅未試過身同感受？又試問邊個做老竇嘅唔會明白？孫柏文話， 最慘我哋特區冇好似花旗國Oprah Winfrey咁，喺電視中能善解人意、做心理輔助嘅清談節目主持人。如果有，李澤楷應該上去，真心同我哋講佢同佢老竇嘅嘢。如果到時李澤楷有需要，等 Oprah可以攬實佢講一句：「Richard，it took courage to tell us what you told us today。If you want to let it out，let it out...」
No comments:
Post a Comment