滙豐取消派息？

今朝凌晨，花旗國聯儲局議息。孫柏文落筆一刻，唔知減幾多息。大家都知道，聯儲局減息，係因樓市泡沫爆破，掀起一場又一場信貸風暴，直接影響到金融系統嘅穩健。呢幾日，繼續有信貸風暴帶來嘅新聞值得一提。

前日，瑞銀UBS宣佈，佢哋又要為花旗國次按撥備百億美元。可能因為早前UBS已經做過撥備，而當時又俾人感覺已經做咗「最壞打算」，今次再撥，管理層一定知道股東對佢哋嘅信心完全崩潰，甚至對銀行穩健非常懷疑，所以今次宣佈撥備嘅同時，亦宣佈有新投資者、包括新加坡政府投資公司入股。

UBS取消派息

孫柏文睇過一段新加坡高官訪問，講到金融業定位，佢話，想見到新加坡變成東南亞嘅瑞士。即係附近啲有錢佬擺錢喺度，就算周邊七國咁亂，啲錢都會安全。即係想做A貨瑞士。不過，今次新加坡唔使再做A貨瑞士，因為買起真嘅瑞士都可以。

新加坡政府動用國民嘅血汗錢，入股UBS，我只可以話，佢哋冇吸收我哋祖國嘅教訓。

幾個月前，祖國入股黑石同巴克萊銀行，原來上咗賊船。新加坡政府第日嘅遭遇都會一樣。不過，UBS再撥備嘅公佈中，最值得大家留意嘅係，佢哋決定取消現金派息。奉勸所有同我包拗頸嘅滙豐（005）股東，你哋最鍾意話滙豐派息高，所以買。你哋要記得，派息唔係必然嘅。

最後，我想讚啲喺世界各地主流傳媒（Mainstream Media，MSM）嘅同行。因為，以前每次啲政府或金融機構出嚟「做啲嘢」時，主流傳媒都係會話：「睇吓，做嘢啦！一切問題已受控！」

主流傳媒有料到

遇上《金手指》再次話：「冇料到，繼續死。」就會有一百幾十個網友，發電郵嚟話：「明燈，睇吓啲主流傳媒專家點講先啦。你都唔識，淨係出嚟嘩眾取寵呃飯食。」不過，今次就唔同，主流傳媒「專家」居然比我早好多話，救市計劃冇料到。雖然，我唔係話主流傳媒已變成孫柏文。不過，主流傳媒真係感染咗我啲「明燈」邏輯。

有如幾年前好流行嘅花旗國rapper Eminem曾經問過，will the real 明燈 please stand up？