SIV上身 滙豐輸幾多？

上個禮拜，孫柏文解釋過，滙豐（005）股東賬面見唔到嘅兩個SIV 雖然該死，不過點解滙豐仲要攬上身，全因啲財雄勢大嘅投資者，當時入股同借錢畀啲SIV，只因對滙豐管理有信心。如果滙豐今日唔出手相救，呢班投資者一定會翻枱，以後唔幫襯滙豐。

仲有，我亦解釋過，滙豐點解原先要搞啲SIV出嚟。理由係，理論上滙豐只係「管理」啲SIV，賬面上唔關滙豐事，就係咁繞過咗例如存款準備金等嘅政府規定，加大槓桿比率。槓桿大啲，如果順風順水，錢都賺多啲。

SIV本身都係借短債，需要不停循環貸款，一路新錢冚舊數。點知啲SIV 真係出事。借唔到新錢，你可以話因為有credit crunch，又可以學我咁話，因為啲SIV根本係資不抵債。點都好，滙豐就攬上身。

大家自自然然下個問題會問：「上身，滙豐嘅代價係乜？」如果順風順水，SIV啲資產真係冇事。滙豐不但冇代價，仲會賺錢，因為原先SIV股東同債權人會賺嘅錢，全歸滙豐。滙豐仲因為對啲投資者不離不棄，贏埋口碑。

一吓就要跌15元

當然，作為叫大家「一注獨沽滙豐」嘅財經口水佬，我唔覺得呢個童話故事式嘅結尾，會發生喺滙豐身上。今次，只係一次財富轉移。由005嘅股東，轉移啲資產畀 SIV嘅股東同債權人。

轉移幾多？根據Moody's計算，滙豐兩個SIV嘅資產，大約只值票面嘅70%。揮發咗嘅30%就值125億美元。如果滙豐硬食呢筆虧損，而市賬率唔變，滙豐股價一吓就要跌15元。即係離我叫大家「一注獨沽滙豐」嗰日嘅112.5元目標價不遠。如果你係滙豐股東，就要小心、小心。

最後，噚日孫柏文睇報紙，見到屯門有個叫陳耀聰嘅中學生，踩單車飛落山。

原來，佢係無需要跌落去。佢跌咗落去嘅原因，係因為佢喺懸崖邊掙扎時，唔肯放棄架單車。真係寧願死都用大髀夾實架單車。點知支持唔住，人車齊墮懸崖。

聽聞，佢係文武全才，他朝做邊行，我真係唔知。不過，如果佢選擇做金融業，我就真係希望佢可以從今次事故吸取教訓。有危險時，就算係愛股，頂唔順都要放出去。今次佢只係小小損手爛腳，他日可能冇咁好彩。