銀主盤隔籬爆大鑊

噚日，孫柏文應承過大家，再插花旗國財長保爾森呢幾日不斷吹風嘅計劃。聽聞，個計劃係希望可救啲做咗「還還吓利息會跳高按揭」adjustable rate mortgage（ARM）嘅業主。即係頭兩年利息超低，兩年之後利息會跳上嘅按揭。因06年係ARM熱潮高峯期，所以08年會係利息跳上高峯期。好多按揭嘅利息跳上，碰上樓市下跌，就會製造負資產斷供潮。好多單位會被債主充公。

董建華又嚟噏嘢

不過，花旗國政府又話唔想「一刀切」，救晒做過呢種按揭嘅業主。如果話要甄別邊個「得救」，邊個冇份，淨係咁都已令計劃冇辦法行得通。

正當我喺網上瀏覽，希望可以搵多啲「拯救負資產」計劃嘅內情。點知，原來花旗國總統會喺噚日我交稿限期之後，發表計劃內容。即係今日篇文未插得保爾森住。不過，噚日正當我諗寫乜好時，喺牆上嘅電視機，突然見到前特首董建華喺中大發言。一睇，百感交集。

以前，特區爆發負資產斷供潮時，亦有好多單位被債主充公，變成冇人住嘅銀主盤。當年，好多斷供被迫遷嘅人，就連搬屋嘅心情都冇。作為鄰舍，分分鐘隔籬個銀主單位嘅雪櫃不單止冇搬走，連雪櫃裏面嘅食物都冇清理。如果遇上個單位被斷電，就會有好多曱甴。

其實，呢種斷供潮爆發嘅「社區問題」，不單止喺人口密度高嘅特區出現。今年夏天，我曾經解釋過喺花旗國，有好多有泳池，不過冇人住嘅銀主盤，喺雨季時爆發蚊患。

保爾森用心良苦

原來，喺冬天一樣有問題。正當大雪紛飛時，好多省市有條例要求業主喺24小時之內將門前行人路嘅積雪鏟走。業主唔鏟走，政府幫你鏟。不過要收錢同罰款。今時今日實在有太多銀主盤，政府鏟都唔夠人。仲要因啲按揭已經被賣出、分、拆再賣出，政府要搵個話得事嘅銀主代表都好難。保爾森想阻止斷供潮發生，唔係淨係為咗啲銀行咁簡單。