財經台講伊朗 勁搞笑

噚日晏晝，孫柏文有機會睇到某個收費電視財經台（唔係我有份做節目嗰個）。我睇嗰刻，佢哋啱啱播緊好似叫「商品乜乜騷」，講嘅係石油。佢哋請嚟某金融機構女發言人發表意見。我一睇就諗：「好嘢！講石油，又有女睇，開正我嗰瓣。」所以我就乖乖哋，睇吓有啲乜嘢講。睇完，我就決定寫今日呢篇文。

首先，講油價本身嘅升升跌跌，我唔係好記得佢講過啲乜。淨係記得好多乜乜「花旗國石油庫存量報告」、物物「石油生產國唔會增加產量」等等嘅評語。孫柏文唔記得嘅原因，就係因花旗國石油庫存係呢個石油大升浪當中，冇消失過。話到明大升浪，懶醒走去留意庫存量報告，只會令自己眼花撩亂，分分鐘做錯買賣。

增產？no way

至於嗰啲OPEC石油生產國，講增產減產，真係「超低能、勁搞笑」。

OPEC講「增產」？大家要知道，OPEC已經用緊100%嘅可生產量。OPEC講「增產」，都只不過係講緊「增加生產配額」。大家又要知道，除咗印尼同委內瑞拉之外，其他幾個石油生產國已經超晒配額。

大家可能會問：「個節目講啲嘢咁『行』，你又會去繼續睇？」因為好戲在後頭。節目主持人問：「點解現貨油價比一年後交收嘅油價平？」去到呢度，我仲估個女發言人會好「行」咁話，現貨價比一年後交收價平，係因為石油生產商如果可以即時交收，就可以慳番啲油庫租金。

陰謀論？OK

點知，個女發言人話：「現貨價比一年後交收價平，係因為喺一年後嘅世界，花旗國現任（好戰）總統已經卸任。而且因早排中情局（CIA）出咗份報告，話伊朗已經喺03年放棄核武，所以未來一年打仗機會好微。」

嘩！呢啲陰謀論，一向都係孫柏文嘅專利，估唔到會有人搶飯食。不過我就諗，中情局，係咪就係嗰個喺03年話伊拉克有核武嘅中情局？我知！我知！根據中情局推論，伊朗一定就係喺03年將所有核武研究，送咗畀薩達姆，只不過收得太埋，到今日都未搵到。

講真，如果真係想玩陰謀論，當年伊拉克被花旗國打，係因為佢哋拒收美元。動搖美元喺世界貨幣中心嘅形象。上個禮拜，伊朗宣佈拒收美元。不過，我唔信伊朗會被打。因為呢幾年嘅伊朗，講就天下無敵，做就有心無力。