分清風險與不明朗

差唔多到年尾，相信大家同孫柏文一樣，陸陸續續睇到啲總結07年嘅文章。又適逢噚日喺澳門又有新賭場開幕，今日我想推介一本今年我覺得最有啓發性嘅書。一定要睇。

呢本書，就係上排我去有線電視做Money Cafe成日講嘅《Black Swan黑天鵝》。呢本書簡直就係「Kinder出奇蛋」，睇完有嘢諗、有嘢炒、同有嘢講，聖誕節落吧肯定冇悶場。

點解有新賭場開幕，會令我想重提《Black Swan》？係因為作者Nassim Taleb令我好認真咁將「risk風險」同「uncertainty不明朗因素」分開對待。

佢話，有次出席「如何避開未來大鑊嘢」研討會。出席嘅，由股市炒家到國防軍部都有。主辦單位可能覺得自己有小聰明，所以喺賭場酒店會議廳舉行。到個作者發言時，佢就即時責罵主辦單位。話佢哋根本唔明「風險」同「不明朗因素」嘅分別。亦即時攞「賭場」呢行分析。

佢話，基本上，「辦賭」係當今世上透明度最高嘅行業。例如，一個大有錢佬同一個有上市嘅賭場「肉搏」，跟住贏咗個賭場好多錢，令個賭場要發出盈警。呢個「風險」完全有得計。賭場管理層應該擔心，同準備自己嘅大鑊嘢，唔係呢啲完全有得計嘅「風險」。

國際銀行爆大鑊

大家可能會問：「咁乜嘢先至係要擔心嘅大鑊嘢？」佢話，花旗國有個賭場，裝修時有個工人受傷。工人告賭場，點知賭場贏咗。工人心生不忿，買咗好多炸藥，跟住走去賭場大樓地底停車場，諗住同賭場「一鑊熟」。好彩工作人員發現，先至冇事。呢個就係賭場管理層要擔心嘅「大鑊嘢」。

講咁多為乜？除咗想推介呢本書，大家睇到以上賭場嘅例子，可能會話：「買保險就得啦！」不過，有冇諗過，你係呢個賭場，個工人又成功引爆，你真係買咗保險，不過間保險公司執笠，冇得賠。係咪好恐怖？聽日，我會話你知，點解今時今日啲國際銀行，就係面對咁樣嘅情況。