繼續整理銀行殘骸

呢場國際銀行金融風暴，如果由舊年8月開始計，其實已打咗8個月風。大家應該同孫柏文一樣，覺得好疲倦。最能代表呢種打呵欠嘅態度，莫過於上個禮拜，UBS行出嚟話又要撇賬190億美元，仲要換埋管理層，不過市場冇乜大反應。

190億美元！差唔多1500億港元！當年成個「玫瑰園計劃」都係1600億港元！一季就炸毀青馬大橋，整沉赤鱲角機場，冇埋西九、西隧！原本唔想用咁多感嘆號，不過就算上季撇咗190億美元，應該仲有囉！

風暴過後滿目瘡痍

舊年8月16日，我寫咗篇題為「呢場信貸風暴叫Katrina」嘅文。基本上話過呢場信貸風暴，就會令金融業好似颶風Katrina打過嘅新奧爾良一樣。場風就算過去，剩下嚟只有頹垣敗瓦，人口得打風前嘅六成。

冇辦法，有如新奧爾良一樣，金融業係戰略高地，不能就咁放棄。重建工作有幾辛苦，都要去做。

近排就有兩個會計指引改變，值得一提。首先，就係關於近乎銷聲匿迹嘅 SIV。最新嘅花旗國會計指引，卒之將Qualifying Special Purpose Entity漏洞堵塞，我只係知從今開始，銀行唔可以再喺自己賬簿以外範圍，成立名義上獨立、不過實際上銀行要攬上身嘅SIV。

銀行仲要喺09年之前，「搞掂」啲SIV，一係整死佢，一係攬上身。

作為一個誠實財經口水佬，我第一個認會掛住啲SIV，因為實在提供過太多寫作題材，曾幾何時爆一間SIV，能夠寫足一個禮拜。

除咗會冇SIV呢樣嘢之外，聯儲局好似會用「拖字訣」去解決銀行嘅壞資產。希望可以拖拖吓，未來有足夠嘅盈利，先至慢慢撇數。因為如果今時今日，一次過撇數，將會同花旗國30年代大蕭條嘅開始一樣，銀行倒閉、資金冇渠道、經濟癱瘓。

原來有新指引，如果銀行資產有價有市，不過銀行覺得個價「唔靚」，就毋須要用市價計算資產價值。即係銀行話值幾多就幾多。呢場風暴之後，重建真係辛苦。