絕對保證大米唔會短缺

短缺。

真係唔可以講笑，短缺呢味嘢真係非常可怕。

你每日嘅生活，如果一直面對開短缺，咁只係生活嘅一部份。不過如果一直買乜都供應充足，突然間短缺就會好麻煩。

情況就如你一路以嚟都冇電用，繼續冇電用，感覺上只係有一份可惜。不過你試吓我哋特區人，忽然要面對一日冇電用嘅生活，淨係冇得睇電視、追劇集，都可以暴動。

唔好話冇電用咁嚴重，如果因為慢咗交寬頻單，搞到冇得上網，你屋企又有一個十幾歲嘅小朋友，咁就肯定出事。

價格浮動預防絕招

所以，孫柏文作為一個熱心社會，搞咗公共政策智庫組織「獅子山學會」嘅人。我當然幫手諗吓，如何防止短缺情況喺香港出現。不論社會主義、共產主義、自由市場，只要可以防止短缺情況，我都會支持。

咁啱得咁蹺，只有自由市場，可以提供防止短缺嘅方法，所以我都逼不得已，支持自由市場。

自由市場防止短缺出現嘅方法，就係容許價格自由浮動。只要價格可以郁，就唔會出現排隊、貨架冇貨等標誌着短缺嘅現象。價格自由浮動就係一粒絕對打死短缺嘅銀子彈。

較早時，特區忽然出現搶購大米。好多同香港人思維脫節嘅傳媒工作者、民粹議員，就話「擔心大米會出現短缺」。咁冇我做副局長支持嘅馬時亨局長，就反射式出嚟話「無需要擔心大米出現短缺」。

防止趁火打劫法例

大佬！大米冇短缺，呢個就所有香港人都知，因為香港行自由市場，冇價格控制。

搶購大米嘅人，只係好似舊年宣佈有資金自由行嘅股民一樣，瘋狂入市，唔係驚股票短缺，只係驚冇上車。所以如果當日馬局長有我做副局長支持，佢就可能會話：「買米好正常，不過價格可升可跌，所以各位師奶應該量力而為。」

不過大家可能會問：「如果自由市場可以防止短缺，咁點解上個禮拜花旗國有超級市場話要限制顧客買米數量？玩配給？」

因為花旗國嘅民粹議員，通過賦予政府防止「趁火打劫 price gouging」嘅法例。所以超市每次加價，都心驚膽跳。就係咁，寧願啲人有錢、有需要都買唔到米，好過加價跟住益晒啲律師。

特區其實都想通過防止「趁火打劫」嘅法例。叫做「計劃競爭法」。咁最支持呢條法例係邊個？咪就係公民黨囉！

最後重申一次，價格自由浮動，保證一定冇短缺！