股場 Matrix 熊證 Neo

大家作為《金手指》fan屎，應該睇過一齣《22世紀殺人網絡》（Matrix）嘅電影。如果未睇過，唔該今晚租隻VCD去睇睇。因為覺得《金手指》好睇嘅人，都應該會覺得《22世紀殺人網絡》好睇。

不過，如果你睇過，就應該記得戲裏面叫Neo嘅主角奇洛李維斯發現自己可以扭曲時空。就算對方瞄準佢發射，即使子彈亦已離開槍管，佢不但可以避得開，仲有能力還擊。今日重提呢齣電影，係因為噚日孫柏文見到股市版嘅Neo出現。

大家都知道，06年牛熊證開始出現。不過初期成交薄弱，直至到我喺06年寫咗篇文，個題用咗「一注獨贏」四隻字叫大家買某隻恒指熊證之後，成交就開始上升。一定因為係我！我真係一個天才sales。至少朋友利世民都係咁諗。所以利世民就叫我做「熊證之父」。

咁熊證又關Neo乜事呢？相信大家都知，牛熊證同認股證唔同嘅地方，就係牛熊證有「強制性收回價」。即係如果本身股票或指數價升或跌至某個位，牛熊證發行商就可以強制性回收。即係處死。所以回收價亦被稱為「打靶價」。

噚日，喺市未開之前，全世界都覺得恒指會裂口高開好多。好多熊證觸動咗「打靶價」。即係子彈亦已離開槍管。問題係「打靶價」會比「行使價」低，所以就算熊證被收回，都應該會有剩餘價值。到時候，發行商就會發還剩餘價值畀啲熊證持有人。

最後唔死仲有錢賺

不過，計算剩餘價值唔係用「打靶價」計，係用嗰日本身股票或指數最高價位去計。即係如果唔好彩，買咗熊證，不但升到「打靶價」，仲要升穿「行使價」，咁就會乜都冇。

噚日，就有一隻熊證觸動「打靶價」，喺開市前10秒就有人恐慌性拋售，之後當恒指正式報價就停止買賣。不過該10秒嘅交易價，就反映拋售嘅人覺得恒指噚日會升到24476點。

不過，恒指最高只見24195點，熊證未至於完全死亡，發行商將會退番最後交易價嘅逾兩倍嘅金額。噚日係嗰10秒買咗呢隻熊證嘅人，仲唔係股場嘅 Neo？