Thursday, April 03, 2008

股場 Matrix 熊證 Neo

大家作為《金手指》fan屎,應該睇過一齣《22世紀殺人網絡》(Matrix)嘅電影。如果未睇過,唔該今晚租隻VCD去睇睇。因為覺得《金手指》好睇嘅人,都應該會覺得《22世紀殺人網絡》好睇。

不過,如果你睇過,就應該記得戲裏面叫Neo嘅主角奇洛李維斯發現自己可以扭曲時空。就算對方瞄準佢發射,即使子彈亦已離開槍管,佢不但可以避得開,仲有能力還擊。今日重提呢齣電影,係因為噚日孫柏文見到股市版嘅Neo出現。

大家都知道,06年牛熊證開始出現。不過初期成交薄弱,直至到我喺06年寫咗篇文,個題用咗「一注獨贏」四隻字叫大家買某隻恒指熊證之後,成交就開始上升。一定因為係我!我真係一個天才sales。至少朋友利世民都係咁諗。所以利世民就叫我做「熊證之父」。

咁熊證又關Neo乜事呢?相信大家都知,牛熊證同認股證唔同嘅地方,就係牛熊證有「強制性收回價」。即係如果本身股票或指數價升或跌至某個位,牛熊證發行商就可以強制性回收。即係處死。所以回收價亦被稱為「打靶價」。

噚日,喺市未開之前,全世界都覺得恒指會裂口高開好多。好多熊證觸動咗「打靶價」。即係子彈亦已離開槍管。問題係「打靶價」會比「行使價」低,所以就算熊證被收回,都應該會有剩餘價值。到時候,發行商就會發還剩餘價值畀啲熊證持有人。

最後唔死仲有錢賺

不過,計算剩餘價值唔係用「打靶價」計,係用嗰日本身股票或指數最高價位去計。即係如果唔好彩,買咗熊證,不但升到「打靶價」,仲要升穿「行使價」,咁就會乜都冇。

噚日,就有一隻熊證觸動「打靶價」,喺開市前10秒就有人恐慌性拋售,之後當恒指正式報價就停止買賣。不過該10秒嘅交易價,就反映拋售嘅人覺得恒指噚日會升到24476點。

不過,恒指最高只見24195點,熊證未至於完全死亡,發行商將會退番最後交易價嘅逾兩倍嘅金額。噚日係嗰10秒買咗呢隻熊證嘅人,仲唔係股場嘅 Neo?

2 comments:

  1. 自去年8月17日後 (如果冇記錯)
    我被夾到訓低之後
    就再冇玩輪...
    因為輪商實在"太好人"...
    玩輪, 真係有閒錢先好玩...
    君不見牛熊證有什麼分別
    都係差唔多...都係俾人玩
    唔知何年何月何日先有公平d o既方法做淡
    (期指玩唔起...哈哈)

    淡友的我上

    ReplyDelete
  2. 捕捉牛熊或窩輪開市時的不問價沽售確實利錢甚豐,問題之一是除聯交所AMS3機外,相信其他券行和銀行落盤平台不能提供快速的落盤服務。

    尤其中銀和匯豐(當然包括恒生),9:59下單,你估下幾時先落到?

    Meet 你個胃呀...10:00:30

    ReplyDelete