華懋公司文化已死？

香港作為一個自由經濟社會，當然好自由同經濟蓬勃。經濟蓬勃當然衍生出好多唔同嘅公司，自由亦令佢哋百花齊放。

而香港做得「經濟神話」，本身就一定因為有好多好傳奇嘅公司。

「傳奇」呢樣嘢就可能同「性感」一樣，有時若隱若現，反而會更「傳奇」。所以作為一間公司，最「傳奇」嘅可能就係啲冇上市嘅公司。

記得以前，孫柏文仲係石油股分析員時，老闆曾經講過：「一間公司上市，本招股書裏面睇到嘅嘢，就好似一個女人剝光豬，赤裸裸畀你任睇。」任睇？Not sexy。

一幢幢樓冇人住

咁喺大家心目中，究竟覺得邊間冇上市嘅公司好傳奇？如果十年前有人問我同一問題，我都係同一個答案，特區最傳奇嘅公司一定係華懋集團。

我仲記得點解會得出呢個結論。十年前，我放暑假跟老竇去跑夜馬，入沙田馬場聯絡父子感情。嗰一刻，我哋企喺大看台，睇住某場長途賽。我就買咗隻放頭馬，點知一開閘已漏閘，所以隻眼就睇吓其他嘢。點知畀我發現喺城門河對面，有一幢幢冇人住嘅樓。腦海中充滿迷思。

最傳奇最慳公司

場馬跑完之後，我指向嗰幾幢冇人住嘅樓問：「老竇，上次放假時嗰啲樓已經起好，點解仲係冇人住？」佢解釋嗰啲樓係華懋起嘅，佢哋唔中意賣就唔賣。到咗十年後嘅今日，嗰啲樓都仲未賣晒。華懋仲唔「傳奇」？

如果要問大家用一個字去總結華懋嘅公司管理文化，相信大家都會揀個「慳」字。今日，我要講華懋嘅原因，就係因為我察覺到華懋呢個「慳」嘅公司管理文化，有被蠶食嘅迹象。

XX是美德，唔通特區最後一個「美德碉堡」被攻陷？

我哋壹傳媒嘅中環直播室，就係喺一幢華懋擁有嘅商業大廈裏面。一直以嚟，啲廁所冇廁紙。第一次見到時，都忍唔住問咗句：「咩世紀呀，大佬？」不過，對上兩個禮拜，我就開始發現啲廁格有廁紙。

大家都知，免費就只會鼓勵人哋浪費，美德事小，破壞環境事大。我返到《蘋果日報》，就問咗財經版前輩Winery，有廁紙係咪代表華懋嘅文化已死？Winery冇答到，反而問：「啲廁紙會唔會係陳振聰擺架？」