反「藍衣衛士」的真正理由

上個禮拜一，施永青先生同我去咗有線做Money Cafe節目嘅嘉賓。講關於傳遞奧運聖火。

喺節目裏面，我同施老闆都同意負責保護奧運聖火嘅「藍衣衛士」，特別喺倫敦同巴黎站嘅表現，只能用「做得唔啱」嚟形容。不過，講到「藍衣衛士」嫌有個傳聖火嘅英國鬼妹跑手，舉聖火唔夠高，鑑粗捉住、推高佢隻手時，我問咗個問題，令施老闆展示激情嘅一面。

問題係，事件發生後，英國傳媒一面倒形容「藍衣衛士」為兇漢。
佢哋啲鬼佬一定會諗，一班中國派去嘅部隊，喺佢哋嘅首都，喺幾百個鏡頭面前，，都可以為得象徵性意義嘅聖火，去推人。
咁如果喺西藏、冇鏡頭，為咗我國領土完整，呢個任何國家最不可侵犯嘅原則，中國政府又會點樣「關門教仔」？文化滅絕？佢哋骨子裏分分鐘相信，中國政府會種族滅絕。

在乎鬼佬感覺

施老闆就係覺得「藍衣衛士」嘅「唔啱動作」，都唔可以咁樣上綱上線。唔可以話有理由相信，中國政府喺西藏進行文化滅絕。呢點孫柏文絕對同意。幾個未見得大場面嘅鄉下仔「藍衣衛士」，丟哂13億人民嘅架，絕對不能證明中國政府喺西藏做緊啲乜。相反我自己相信，中央政府已經大幅補貼西藏居民，只係外間唔知。

不過嗰日，我嘅問題唔係「現實係點」，而係「啲鬼佬有嘅推斷，點算？」

大家可能會話：「清者自清，現實先至最重要。啲鬼佬嘅三流推斷同感覺，who cares？」

初頭，我都覺得啲鬼佬嘅三流推斷，毋須理會。不過唔知點解，骨子裏非常在乎啲鬼佬對我國嘅感覺。經過一個禮拜思考，我卒之領略到點解。

我係最想見到祖國崛起嘅人。問題係要崛起，中國人手裏最多有啲乜？同時又會最需要啲乜？冇錯，我哋有最多嘅就係美元，最需要係原材料。就因為咁，所以我好在乎鬼佬對我國嘅感覺。點解？

小不忍亂大謀

05年中，中海油（883）宣佈以185億美元作價，全面收購花旗國油公司 Unocal。當時作為石油股分析員嘅我，當然日日追住事態發展。最後，花旗國Chevron，只係出171億美元，就成功擊退中海油。結果令我呆咗，永不忘記。

中國人手上1.08美元，購買力居然細過鬼佬手上嘅1美元。

我問自己，點解會咁？原因係喺佢哋心目中我哋形象差。

每次我哋衝擊家樂福、圍堵CNN 嘅Cafferty、支持「藍衣衛士」，中國人手上美元嘅購買力折扣就會增加。為達到祖國崛起，除非有軍力去搶原材料，小不忍則亂大謀。

所以如果你同我一樣反「藍衣衛士」，希望香港傳聖火當日，有好多差佬保護啲「藍衣衛士」to protect them from their own stupidity，不過俾人問點解，你只需答：「Unocal，never again。」