羅杰斯：原材料價照升

噚日，相信大家都應該睇到，我哋《蘋果日報》財經版專訪，有「商品大王」之稱、國際大鱷索羅斯前合夥人羅杰斯。

孫柏文有幸係其中一位有份參與訪問嘅同事。雖然訪問當日，我睇落去非常淡定，不過我真係非常緊張，個心扑扑跳。

冇辦法，因為唯一能夠明白我當日心情嘅人，就係嗰啲見到韓國歌手Rain嘅十幾歲o靚妹fan屎。真係有如當年軟硬天師話齋，我差啲就「見到偶像，成個彈起」。

當然，我已經唔係十幾歲。我明白一個「偶像」，可以「遠睇誇啦啦、近睇吹喇叭」，所以令緊張心情更複雜。好彩，訪問完後，我更崇拜佢。

我由知道有份參與訪問個刻起，幾晚瞓唔着覺，不斷反覆咁諗問啲乜呢？

最後，因為我今時今日係一個原材料大好友，好大原因都係因為佢，所以就決定問佢老人家，一啲動搖我對原材料升浪信念嘅問題。好似教徒問教宗一樣。

我問：「好多人話，新興市場對原材料嘅需求增幅，只係因為嗰啲原材料被變成出口貨品，去美國或歐洲嘅市場。一旦因為樓市爆破、信貸危機，嗰啲地方嘅消費者投降，原材料需求就會縮減。原材料價格就會下跌。」

供求失衡價易升難跌

羅杰斯答：「需求縮減就一定。如果皮鞋需求縮減，皮革嘅需求就會下跌。不過，喺我以前本書《Hot Commodities》裏面曾經用過鉛做例子。以前，鉛嘅兩個最大用途，就係用嚟製造有鉛電油同油漆。喺最近幾十年，世界各國已經停售呢兩種產品。你一定會覺得鉛價會大跌。最大兩個用途冇咗喎！仲唔跌？

點知，今時今日鉛價喺歷史高位徘徊。點解？因為鉛礦嘅供應比需求跌得仲快。所以原材料升浪，一定會繼續。」

聽佢講完之後，我就諗，究竟有乜嘢原材料，好似鉛一樣，最大用途突然消失，不過供應比需求跌得快得多。大家作為《金手指》嘅fan屎，都知我諗緊嘅原材料就係白銀。所以再次重申一注獨贏買白銀！