中電（差啲）食大茶飯

幾年前，孫柏文第一次聽到中電（002）想喺特區搞液化天然氣進口，真係百感交集。首先，因為將天然氣液化嘅過程同維持液狀需要大量能源，由遙遠嘅氣田經海路運到特區，從環保角度上可能唔值。以上對環保嘅憂慮，禮拜一講過。

話到明百感交集，有憂慮就當然又有喜悅。為乜開心？就係因為搵到個連哈佛大學MBA課程都會用嘅case study，一個「如何玩政策屈機」去搵錢嘅例子。

玩政策屈機絕橋

首先，中電始終都係上市公司，根據經濟學教科書，佢哋存在嘅唯一原因就係要賺錢。而喺平時啲公司要賺錢，就係要喺同其他對手競爭之下，最能夠滿足消費者。

不過，中電就唔使，佢哋就有一個叫做「利潤保證計劃」去保證利潤。作為中電，能「保證利潤」嘅，一定希望繼續。

問題就係，「利潤保證計劃」如何計算最後嘅利潤？條方程式其實非常簡單，
就係：投資金額 x 保證回報率 = 利潤。

中電最終只係對利潤有興趣，求其投資金額 x 保證回報率得出嘅總數可以大啲，就一於好少理。

當然，羊毛出自羊身上，利潤點計算都好，最終都係市民出錢，所以啲民粹議員就出手介入。

而喺「投資金額 x 保證回報率」當中，大家都應該留意到民粹議員永遠只係攻擊「保證回報率」。作為中電，你要打回報率其實冇所為，因為只要可以谷大「投資金額」，搵嘅錢分分鐘多咗。

問題就係，點樣谷大「投資金額」？一間公司，要做更多投資嘅原因，多數係因為賣緊嘅嘢供不應求，不過中電當然冇呢個問題。咁公司做投資，又可能想令供應非常穩定，呢個中電又已經做得綽綽有餘。喺呢個情況之下又如何谷大「投資金額」？

大陸截糊衰收尾

冇錯！就係投資令賣緊嘅嘢「改良咗」。大家可能會話：「一度電就係一度電，改咩良？」

以前，一度電係「一度污染電」，未來經過投資之後，一度電就會成為「一度乾淨電」。

就算市民最初覺得，香港空氣污染元凶係大陸啲廠，經過陸恭蕙悉心策劃嘅「科學研究」（香港是最大源頭！香港是最大源頭！香港是最大源頭！hohoho），記者傳媒已經中晒招（香港是最大源頭！香港是最大源頭！香港是最大源頭！）。

中電就諗住有足夠民意支持去投資幾百億搞液化天然氣進口。不過最後棋差一着，天然氣發電ok，但政府就話用唔需要大量投資嘅大陸管道進口天然氣。

中電差啲食到大茶飯，too bad。