金融火場的黑色幽默

孫柏文作為一個報紙嘅財經口水佬，今時今日嘅大勢好難落筆寫。由我落筆到你睇到嘅一刻，分分鐘已經24小時。唔好話24小時，你問完我點睇之後24分鐘，我嘅答案可能已經變晒，事件發生速度就係咁快。

世界雖然好似木屋區大火咁，事態不斷變同笠笠亂，不過喺呢場火災中就有班友勁搞爛gag。

佢哋係乜水？咪就係班財經博客。寫blog好多時嘅運作，就係有新聞，跟住博客畀反應。以下就係幾個黑色幽默例子。

如木屋區大火笠笠亂

新聞：禮拜日，前聯儲局主席格林斯潘上電視，講話今次呢場金融危機係百年一遇。
博客反應：縱火者分析火勢。

新聞：Bear Stearns在3月被救，8月雷曼就要執笠，不過兩日後又出手借850億畀AIG。政策上有出入。
博客反應：雷曼就係一個鍾意走去隻狗度，跟住大力拉狗尾嘅小朋友。今次拉咗隻大狼狗嘅尾，所以被咬死，冇人救。

Bear Stearns就係一個好鍾意煲蠟，家住高樓大廈嘅小朋友。今次玩出火，焚毀屋企，要派消防車救火，為免波及鄰居。

AIG就係一個誤打誤撞，撞入一間生化武器實驗室裏面嘅小朋友。將啲睇唔明標籤嘅試管袋晒落袋，跟住同其他小朋友玩。

新聞：多間銀行被國有化。
博客反應：花旗國已變成97年嘅印尼，最大嘅銀行全部國有化。變成高增長嘅發展中國家。

銀行體制健全成笑話

新聞：雷曼冇國有化，佢之前借咗好多錢畀商業大廈發展商起商廈。
博客反應：仲大鑊！花旗國就快變成97年嘅泰國，一棟又一棟，被棄置嘅摩天鬼樓。

當然，最黑色幽默嘅言論，根本唔使反應都已經好黑色。

新聞：花旗國財長話：「銀行體制非常健全。」