東亞擠提 警方應拉誰

孫柏文放假一個禮拜，世界真係好多事發生。最令人注目，當然係花旗國政府嘅 7000億美元買垃圾方案。由原本我走嘅時候，呢個救市方案被視為黑暗隧道中嘅曙光，點知到上個禮拜，市場發覺原來隧道係一條火車隧道，道曙光其實係殺到埋身嘅火車車頭燈。

不過到噚日下午，花旗國傳出立法機關嘅國會同負責行政嘅白宮，成功達成共識，夠票通過呢個問銀行買垃圾方案。基本上，所有黨派嘅領導，都想快快手手通過呢個買垃圾方案。問題係個個派別裏面，都有好大嘅反對意見。

花旗國民反對方案

從我喺花旗國嘅白銀戰隊成員所講，花旗國嘅民間意見，特別係嗰啲最會出聲嘈嘅人，係極之反對今次嘅方案。

喺對上個禮拜，每個國會議員嘅fax機、電話、電郵，都被反對方案嘅選民不斷轟炸。所以除非真係投咗票通過，唔係都可能仲會出現波折。

除咗花旗國嘅買垃圾方案外，如果要講番上個禮拜嘅大事，就不能不提東亞銀行嘅擠提潮。銀行排大隊嘅賓墟場面，以前香港都發生唔少，問題係提款攞本票有冇其他銀行收。

我記得好多年前，渣打銀行都發生過擠提潮。當年我好細個嘅表弟，因為將啲利是錢存咗入渣打，所以就排隊攞錢走。搞到我姑姐為咗個千幾蚊，要陪佢排隊排足成日，幾經辛苦先攞到錢。

之後幾日，我哋一齊出嚟飲茶，我老竇就問我表弟啲錢點，佢就攞個卡通主題銀包出來，畀我哋睇吓佢啲錢。

踢信貸評級公司門

我老竇望一望，之後就問：「你攞嘅全部都係渣打出嘅銀紙，執笠都係唔值錢。」嗰一刻，我個表弟差啲喊出來。

點都好，聽聞政府話會開始拉人，我話非常好！第一個應該踢門嘅地方，就係啲信貸評級公司。

多唔好講，今時今日東亞銀行嘅信貸評級，居然低過6月嘅雷曼兄弟。散播埋啲咁嘅訊息，仲唔抵拉？

講起雷曼，就要提一提啲買咗佢哋出嘅迷你債券買家輸錢事件。好多人嘈話銀行職員，冇話過原來雷曼執笠，係會輸晒啲錢。講真，如果A級評級都要唔信，銀行職員就會個個變成我咁，只會叫人買白銀同黃金。