又有大茶飯Case Study

三日前，標普宣佈會喺佢哋嘅標普500指數，剔除周末被收歸國有嘅房貸美同房利美，前日生效。取而代之有兩家新公司，不過就要今日先至生效。即係呢兩日嚟，大家睇嘅係標普498指數。

其實，喺呢啲跌市大時代，往往都會出現指數唔夠公司嘅情況。今次已經算好，只係兩日唔夠數，記得千禧年時，dot com出現倒閉潮，納斯100指數，長期都維持「納斯九十幾指數」。

債價下跌保險要賠

大家要記得，花旗國財長保爾森，話到明兩房唔倒閉，咁點解又會被人郁出指數？睇番標普公司嘅新聞稿，剔除嘅理由係因兩房嘅市值不足，達唔到要有50億美元市值嘅要求。宣佈剔除當日，房利美市值 10億美元，而房貸美就6億美元，非常合理，履行法治精神。

不過，經過多個月嘅跌市，標普500指數中已有過百間公司，市值唔過50億。如果用「剔除兩房日」嘅收市價計算，標普又堅定執行50億美元市值要求。標普500指數？就變成「標普381指數」。跌市真難搞。

講起兩房，原來又有投資銀行家靠今次危機食大茶飯，搵客戶笨。

事緣禮拜一，有個國際衍生工具仲裁機構，喺完全冇成員反對之下，宣佈兩房被收歸國有，已經滿足咗要求，所以被稱為「倒閉咗」。而所有有關「保險」，亦要賠款。

大家都知，今時今日金融市場乜都可以「買保險」。而嗰班投資銀行家，就賣咗好多保障「一旦兩房倒閉，而令兩房債券價格有負面影響」嘅保險。即係如果兩房倒閉，令兩房債價下跌，保險就會賠。

等同國債更添安全

聽聞賣得最多，就係舊年尾今年頭。呢個絕對理所當然，廣告都話，要搵錢就要細心聆聽客戶需要，客戶擔心兩房出事，啲投資銀行家咪賣啲滿足佢哋需要嘅產品。

大家可能會問：「冇成員反對？保險賠得咁大方？賣呢啲債券保險嘅投資銀行唔通有病？」絕對冇病。個個都知，一旦兩房出事，政府一定會收歸國有。如果係咁，兩房債券等同於花旗國國債，等於安全咗好多，個價必升。

咁嘅情況下，保險又使乜賠？幾勁，有如沙漠賣雨傘！唔怪得啲private wealth management banker可以搵咁多。