接掌兩房 冇拆過彈

前日禮拜一，因為花旗國財長保爾森正式接掌兩房，令好多人反射式覺得可以入市買貨。當日股市升860點，因為啲人嘅第一個反應就係「拆彈啦！」如果係咁，噚日禮拜二又點解會跌？

原因就係，保爾森方案根本冇拆過彈。

周末，保爾森接掌兩房嘅原因，係因為包括祖國等，兩房最大嘅債主，唔肯再借錢畀兩房。令兩房借錢越嚟越貴，喺花旗國按揭市場冇競爭嘅情況之下，借錢做按揭嘅市民就面對更高嘅利息，最後樓市更缺乏購買力，雪上加霜。

花旗國問祖國借錢

咁點解祖國等債主，唔肯再借錢畀兩房？因為驚佢哋還唔到，所以保爾森方案就答應喺2010年前，兩房還唔到嘅債，政府還。大家可能會好天真好儍咁問：「接掌兩房嘅花旗國政府都冇錢，點還？」問得好！政府冇錢咪借囉！問邊個借？咪問祖國借。

冇錯。花旗國政府問祖國借錢，跟住泵錢畀兩房，等佢哋可以還錢畀祖國。花旗國？爛仔。

祖國可唔可以唔借？可以。不過就可能要將手上兩房債券做撇賬。就算唔講因為花旗國消費者投降，打擊祖國出口，唔借錢畀佢哋，我哋仲有選擇咩？

祖國手上嘅美元，試過用嚟買油公司（05年Unocal），就算出最高價，都買唔到。

OK，直接買唔得，可能因為不懂外國人嘅禮儀細節，咁就搵中介人嚟幫手。前宗主國統治香港初期，都有買辦，祖國諗住照辦煮碗，入股Blackstone。由入股至今，輸五成，咁嘅表現，不如畀孫柏文以「一注獨贏」嘅方法去投資，因為表現差唔多。

記得祖國入股Blackstone時，我已經叫停，如果北京有得賣《蘋果日報》，就可以輸少幾百億。

將個鑊卸畀接任人

點都好，大家都留意到保爾森方案，只係答應喺2010年前，政府無限量保證兩房嘅債，2010年開始之後點？雖然佢老人家非常之忙，每日工作十幾小時，不過保爾森仲有時間提大家，非常期待選舉之後卸任。因為基本上，佢將個鑊卸咗畀下一個。

如果連天才保爾森都自認唔識拆彈，個市又點會升？