一票獨投黃毓民

禮拜日，投票日。08年立法會選舉嘅競選期，都已經過咗好幾個禮拜。唔知道大家有冇留意到小弟完全冇講過今次選舉？有冇覺得怪？點解？老實嚟講，提唔起勁。

真心揀人代己議政

不過大家唔好誤會，我一定會投票。揀我覺得能代表我自己，喺立法會議政嘅人。如果唔係，都唔會叫代議政制。今日呢篇文，就係選舉日之前最後一篇，我亦想把握呢個機會，同大家分享我會投邊個一票。不過講之前，想提供一啲背景資料。

首先，黎智英、施永青同我，都係住喺九龍西選區，我住深水埗天台屋（有契嘅，多謝關心！）。以前住港島區，今次第一次喺九龍西投票。所以我一定要承認，就算今次對眾候選人嘅政綱，讀到滾瓜爛熟。感覺上，未去到以前港島區嘅親切。

點都好，競選期開始時，我抱住一個「咩人都可以攞我嗰票」嘅態度，等啲候選人嚟攞。之後，真係對啲政綱好熟。不過就算熟，仍未有定案，直至睇到一段8分鐘長嘅短片。段片就係Now TV九龍西選區嘅辯論。YouTube搜尋「毓民拔刀相助」。

法理有權政治戇居

嗰8分鐘，就係民建聯團隊同社民連黃毓民，每張名單4分鐘自由發問時間。第一個4分鐘，民建聯嘅鍾港武就問民主黨團隊，排喺涂謹申之後嘅林浩揚，點睇涂謹申之前捲入「租議員辦事處」事件。我絕對覺得係一條應該問嘅問題，因為我都想知。

點知，涂謹申唔畀佢答，仲要話團隊有權決定邊個答。

唔知道是否涂謹申係個律師，因為法理上你係有權，不過政治上就係戇居！如果涂謹申落選，真係估唔到係鍾港武搞掂咗佢。

當我非常頹喪之際，到黃毓民發問。基本上，佢一口摧毀民建聯。亦係整個選舉當中，第一次令我喺螢幕前，站起來拍手。

大家作為《金手指》嘅fan屎，都知道「一注獨贏」嘅明燈威力。

今次我一票獨投黃毓民，希望唔係對佢贏今次選舉嘅最大詛咒。就畀次機會你，good luck毓民，4年後一定要再參選，因做得唔好，我要親自踢你落車。