揭兩房被救的大贏家

噚日，《蘋果日報》嘅同事應該都好遲放工，仲分分鐘得個等字，因為要好被動咁等新消息。大家一定估孫柏文講緊我哋政治版嘅同事，因為佢哋要等立法會選舉結果──咁諗就錯。

小圈子功能組別選舉，投票人數少，好快就知，所以唔使點等。直選點票，因為我哋特區已經變成香蕉共和國，啲同事返屋企瞓吓覺，今朝起身食個晏晝，都應該未有結果。

其實，我係講緊我啲財經版同事。咁佢哋等啲乜？咪就係房利美Fannie Mae同房貸美Freddie Mac，究竟會唔會被收歸國有。如果真係收，股票會唔會變牆紙，揸佢哋啲債券使唔使輸錢？
如果要輸，輸幾多？
輸錢嘅債主，例如我國人行，又會有乜反應？

信祖國變超級大國

雖然，正式消息就完全冇，得啲花旗國財經狗仔隊，見到財長保爾森、兩房嘅總裁、聯儲局主席伯南克同房屋信貸局局長，禮拜五一齊開會。不過就令人推斷，兩房國有化在即。好彩唔係特區狗仔隊跟，如果唔係一定估佢哋搞5P Greek party。

大家可能會問：「早排聯儲局唔係已經出咗手，話會保證兩房啲債？無限量借錢畀佢哋？唔係已經搞掂，救咗兩房咩？」係。係已經出咗手，用盡全力相救，不過應該係聯儲局自己頂唔順。

以前我都講過，聯儲局資產5000億，仲要係啲好嘢已經俾人換晒，兩房個窿就50000億，點救？

冇錯！聯儲局呢間花旗國中央銀行冇錢，要財政部救。就係咁，我都真係信祖國變成花旗國級嘅超級大國。因為有小道消息話，祖國人行都好似聯儲局咁作為中央銀行，資產好似好多，不過都係唔夠錢，要問財政部攞。人行應該成手兩房債券，睇住個價日日跌頂唔順。

我食唔到嘅大茶飯

亦因為個個買咗兩房債嘅人，全部頂唔順，罷買，財長唔出手唔得。我落筆呢刻，仍然唔知點救兩房，不過應該所有兩房嘅債，都會有政府白紙黑字嘅保證。後果係現有兩房債券價，將會同花旗國債睇齊，差唔多80點子嘅息差將會消失，花旗國債總數升50000億。咁嘅情況，金同銀都仲可以跌，美元升，有冇搞錯。

有冇大贏家？有。就係嗰啲買兩房同國債息差收窄嘅人，例如全球最大債券基金公司PIMCO。唔怪得佢哋嘅話事人Bill Gross，上個禮拜講到如果財長唔救就世界末日，擘爛面都要佢出手。

真係一鑊我食唔到嘅大茶飯。