Saturday, March 07, 2009

無間地獄

孫柏文喺蘭桂坊某dance club識佢,第一眼cleavage、短裙、超長腿。輾轉之下開始交流,不過因啲聲浪轟到眼癱癱,我只係聽到佢嘅工作同黃金有關。

作為白銀戰隊隊長同埋一個盡責嘅新聞從業員,我第日就打電話畀佢約出嚟食晚飯。當晚,我第一眼又見佢着得「好搶」又係cleavage、短裙,所以就問:「你返咗屋企換衫?」點知佢話:「冇呀。」原來係返工衫。

坐低,我哋就開始傾。佢喺英國讀大學,碩士讀marketing,對科目嘅熱誠高到想做研究生,不過父母唔支持,要佢回港。回港有公司請marketing executive,「marketing」有關所以申請。面試,都冇30秒就被取錄。

原來間公司做黃金孖展。除咗難炒之外,我唔會話黃金孖展啱唔啱。我問個business model係點,佢話一個廿萬元戶口,做3萬蚊佣。「每年?」「唔係,係每月。」佢戶口多,26歲女仔搵錢多過我。佢嘅同事,好多只係中五畢業。

當佢可以賺到3萬蚊佣時,一係個戶口成交額大,一係炒得好密,我唔知個客究竟使唔使蝕本,我亦唔敢問。如果要,咁佢咪一路要搵新客?

靚女經紀每個戶口月搵3萬

佢亦有講,試過有個醉咗嘅客請佢「返屋企」,點知拒絕之後仲要俾個客窒:「我都開咗單,你想點。」佢即場鬧到個客PK,不過我就同佢講:「當你嘅 sexuality係你個pitch咁重要嘅一部份,我可以明白點解會出現咁嘅情況。」

當晚,佢嘆氣幾次。

只希望,喺呢個Faustian交易中,早日覺得搵夠,喺無邪嘅靈魂消失前,早日離開無間地獄。

3 comments:

  1. >> 作為白銀戰隊隊長同埋一個盡責嘅新聞從業員

    辛苦晒!

    ReplyDelete
  2. 佢著成咁返工,佢亦明顯知道自己最大的selling point係乜,才會如此包裝自己。倘若客户因應而有所"要求",怨得D乜?

    ReplyDelete
  3. 呢種「黃金孖展」...有friend同我講,佢地其實係有盈利target,好心o既就只係靠超頻繁交易以賺取大量交易佣金,賺夠每月目標後就暫停,目的係慢慢吸乾客戶d錢,另一種如果孖展公司想個經紀死,通常係外國讀完書返黎d「叻仔」,冇乜搵客技量,客係靠家庭關係開戶,由親戚甚至係父母打本,通常得三個月貨仔就被炒,孖展公司想唔要個經紀之前殺雞取卵,就會要個經紀重注押一邊,之後...大家都估到,個經紀人財工作三失,「黃金孖展」之前壹周刊都報導過,就好似傳銷一樣,只要市場一日有新畢業生,就一日都有呢類「生意」一樣, Good luck patman & your friend!

    ReplyDelete