中油香港 請不要食言

「雖然現在的原油價格低迷，但增加公司的原油儲備量，乃公司的策略及長遠目標，在原油價格回升時，將為股東帶來最佳回報。」── 2009年3月25日中油香港（135）業績公佈裏面嘅管理層討論與分析咁樣寫。

噚日，孫柏文07年叫大家「一注獨贏」買嘅中油香港出咗舊年全年業績。睇大數。油公司賣油價冇自主權跟國際價，公司全年平均賣油價每桶升33%，收入就升35%。合理。

油價冇自主權

不過我成日話，中油香港採油成本高，一旦售價升，毛利率就會槓桿式咁升。所以一望見中油香港盈利升69%時，覺得公司成功充當「冇到期日嘅油價認購證」角色。

仲因舊年公司積極回購自己股票，股數下跌令每股盈利升幅仲勁，升72%。以噚日收市價計，市盈率4.7倍。依家有末期息15 仙，等於股息率有4.3%，算對得住股東。

不過業績始終係睇過去，回望已冇人信嘅decoupled世界。

未來係點？全球石油嘅總可生產量會不斷下跌，淨係睇中油香港下半年勁縮勘探成本都知乜事。

出去執平價油田

雖然舊年公司買咗好多黃豆咁大粒嘅天然氣業務，大家都知天然氣冇得走私，國際價格升，國內冇份，天然氣係冇令盈利爆上嘅能力。

不過首段引述管理層嘅承諾，我只可以話：「請不要食言！用手頭上嘅50億現金同存款，走出去執平價油田吧！」