革命未成功 同志再努力

周文耀、曾俊華等堂堂男人，要搞到女人喊，先肯兩個禮拜後「暫停」勁假交易時段。

錯，唔肯認。
叫咗你唔改會遲早出事，你仲要掉轉頭話我哋唔識。
好嘞，出事，你又唔即時執番正，仲要第一個考慮係點樣保住面子，搵落台階。

唔怪之得呢期無綫《星期日檔案》嗰套「港男．講女」咁多人有共鳴。因為周文耀、曾俊華等人根本唔係男人，佢哋係港女。

港女DNA就好多人都有，不過其他人唔可以亂咁爆發、要學抑制，因為會俾人炒魷或取締。咁點解周文耀、港交所（388）、證監等人又可以次次港女？因為政府官商勾結，係都要一所獨大。

噚日傍晚，孫柏文睇完港交所周文耀解釋，話係因傳媒壓力所以「暫停」勁假交易時段。令我想提一提大家，傳媒話你嘅勁假唔得咁多個月，希望你理性聽，你就乜都唔做。啲人卒之放棄同你討論，因為覺得你無藥可救，開始出聲要結束一所獨大，周文耀即刻做嘢。

傳媒壓力逼住改

點解？就為自己袋裏面厚厚嘅港交所認股權證。因港交所有競爭時，一係周文耀繼續做令股價陰乾，一係即刻俾理性股東炒兼攞番啲認股權證。

結論係，要港交所做啱嘅嘢，就要一路爭取結束一所獨大。今日周文耀嘅讓步，只係一場小勝利。各位希望香港金融業更好嘅人，一定要記得，革命尚未成功，同志還需努力！