歐元必贏美元除非……

某國家的央行印鈔，印完就畀該國政府用，呢個就叫「量化寬鬆政策」。

以前市場有100件產品、100元流通，每件產品價平均1元。央行印多30元畀政府用，產品數目不變，平均價升至1.3元。你個袋裏面嘅一蚊，已買唔到嘢。呢個就係啲人點解驚「量化政策」，點解要拋售該國貨幣。

歐央行唔會印鈔救市

聯儲局印鈔畀花旗國政府，所以啲人就唔要美元。不過有冇央行唔可以印鈔畀政府用？其實係有。因為呢間央行「冇政府管」，起碼冇單一政府可以指指點點，呢間就係歐洲央行。

講話要印鈔救市，南歐嗰班PIGS（Portugal葡萄牙、Italy意大利、Greece希臘、Spain西班牙）要救嘅迫切性，肯定高過花旗國。

不過歐央行係唔可以印鈔買成員國嘅國債，因為買一個國家嘅債，其他成員國一定要佢買埋其他歐國國債。鐵索連舟，政治成本太高。

只要市場覺得聯儲局會「量化」而歐央行唔會，歐元必贏美元，歐元必繼續升。

孫柏文諗諗吓，發現歐元瓦解嘅路線圖。

今年初唔少人開始問，一旦歐洲全面被海嘯冲擊，歐元會唔會瓦解？如果會，路線圖係點？

要瓦解，先要有國家退出。大家一定以為最想退出係啲想自己印鈔「量化」嘅國家，咁諗就大錯特錯。因為呢啲國家已享受咗太耐歐元嘅低息，一旦退出，新貨幣利息即刻飛升。要退一定係強勢退出。

一印鈔歐元區即散

咁歐元區最會強勢退出嘅肯定係德國。如果歐洲啲弱勢國，成功迫到歐央行印鈔買各弱勢國嘅國債，德國退出指日可待。理由係德國以前試過因通脹令希特拉上台，所以非常恐懼通脹。

如果德國退出，歐元就……

所以大家一定要睇實究竟歐央行有冇印鈔舉動，因為唔似美元，歐央行一印「量化」，歐元就玩完。