青姐的淚不能白流！

孫柏文唔記得邊個前輩，發明「勁假」呢個形容詞去形容每日4點後，港交所（388）嘅競價時段，不過我想話：「呢個前輩好勁！」

競價時段勁假

今年初，港交所為勁假時段進行諮詢，一百幾廿個意見，超過半數話勁假根本唔得。連當時支持港交所，希望競價機制能減低收市波動嘅人，依家都反對，因為機制根本做唔到，仲要造市易咗。

試問，點解零零舍舍會有一批滙控（005）股票，喺33蚊成交？臨收市冇、之後嗰日都冇。所有因為滙控由37蚊突然跌落33 蚊，所以相關嘅衍生工具出事而輸錢嘅人，仲會唔會夠膽再玩啲喺港交所報價嘅嘢？

競價時段is a fucking joke！

唔好話係特區經濟支柱，如果港交所係間深水埗士多，噚日單嘢根本唔會發生。因為舊年MSCI執位令幾隻股舞高弄低之後，士多級管理就算唔炒人，都已取消呢個令特區股民變點心嘅白癡機制。

不過現時港交所被政府保護嘅一所獨大情況，根本唔可以容許改錯。唔好話改錯，連道歉都冇。政府知道，由佢哋嚟管會仲衰，不過一所獨大就令港交所同證監權力大到不得了。

詹培忠對銀行嘅憤怒，唔係咩私仇，根本係源自港交所同證監失控所致。

一所獨大難改

禮拜一，青姐（胡孟青）因競價機制提供嘅漏洞，眼見滙控股民被推落街而流淚。各位金融業朋友，係時候要政府開放交易所牌照數目，青姐的淚不能白流！