印鈔後點解唔用直升機

「量化寬鬆措施」，聽到都悶。可能因任總怕我地悶親，所以噚日就對記者直言，話前晚聯儲局宣佈買長債，係啓動印鈔機。印象中任總應該係第一個咁講，金融海嘯又一里程碑。唔記得其他央行行長有冇咁講過。

其實真係要落實「印鈔票推出街」政策，個過程係點呢？

以前，就真係用印刷機印。大家唔好誤會鈔票印多咗，帶來污染，要做到「印多啲」就只要鈔票上嘅面額加啲零就得。電腦年代連呢步都慳番。

問題係，啲鈔票要散到，散完又唔可以被人收集，一定要用咗，先有效。

咁伯南克個花朵「Helicopter Ben」，已透露咗佢上台前至喜愛嘅散鈔票方法。

咁鈔票就印緊，伯南克又上咗位，點解大家又未見直升機頭上盤旋？

唔用嘅原因，係因為唔work。伯南克知道，除非可以令執鈔票嘅人相信今次唔係唯一一次空擲鈔票，如果唔係，啲人執到，都係放喺屋企唔用。

不過，當今世上，係有一個機構，雖然負債纍纍，仲多多錢都肯亂使。呢個機構就係花旗國政府。

前日聯儲局宣佈買美國國債同以前政策嘅最大分別，就係之前印嘅鈔票都仲可能被收集放倉，今次就一定係印一蚊用一蚊。不過任總都問嘅問題係，舉兵殺入戰場，有冇諗過點撤兵？到時一旦通脹升，撤錢冇方法，大鑊兼美元末日。

今次買國債係一個政策分水嶺，亦唔會只得一次。化療下，通縮肯定唔會有，但後遺症會好嚴重。