Monday, June 18, 2007

放下屠刀 慶祝回歸

上個禮拜,昂坪360嘅吊車就成功昇華為希臘神話當中嘅Helen of Troy,一部吊車引發千篇文章。孫柏文當然亦有分享自己嘅見解。今次跌吊車,我話係因果業報,雖然喺寶蓮寺嘅出家人與世無爭、不會上街,不過搞360嘅人,始終逃不過比人類更強嘅裁決者。所以360吊車下墜,係為懲罰嗰啲想將莊嚴嘅宗教聖地,變成澳門賭場般「旅遊景點」嘅人。

盤古開初以來,正邪之戰,一路進行。今次吊車下墜,昂坪360需要完全停駛。大家不能否認,佛門清靜地淪落成廸士尼般「旅遊景點」「煙花」之地嘅速度,明顯係慢咗。就算係呢場永恒戰役當中,正方嘅一次小勝利。

點知,邪方早有準備,唔知佢哋係唔係一早就知正方會有呢次小勝利,所以佢哋就安排咗喺寶蓮寺嘅大佛嗰度,搞個叫做「佛光照耀香港」嘅「慶祝回歸十年」活動。而呢個活動嘅高潮就係放煙花!煙花喎,大佬!寶蓮寺仲唔係煙花之地?

孫柏文想問嗰啲日日掛「旅遊景點」喺口邊嘅人:「你哋幾時先至會識驚?成架吊車跌落來都唔夠?施主們,放下屠刀吧?」


大家可能會話:「慶祝回歸十年嘅嘢,就算係硬膠,不可話唔搞、就唔搞,一定要勇往直前、雷鋒精神!」

大家千祈唔好咁諗。其實,有關團體喺啲「慶祝回歸十年」活動上,已經充份表見過務實嘅彈性,例如,幾個禮拜前電視機日日播放,「好勵志」嘅MTV《始終有你》,經過被修改為《福佳始終有你(路遙知馬力版本)》之後,喺電視機上差唔多已經完全停播。

Taleban爆佛像後下台

冇辦法,孫柏文一 聽《始終有你》,就會不期然諗起《福佳始終有你》裏面嘅歌詞。有關團體都知,所以腰斬播放,盡顯回頭是岸嘅理性。今次如果可以連煙花都停埋,咁上天再出手 嘅機會就應該可以大大減少。

最後,用隻金手指去篤醒啲「慶回歸團體」,最後一個咁唔尊重對待佛像嘅機構,就係03年3月嘅阿富汗Taleban。佢哋用炸 藥炸爆咗啲佛像之後,就因果業報咁喺一年之後下台。最後問多一次,施主們,放下屠刀吧?






Taleban 搞完佛像,不出一年下台。「慶回歸團體」係咪想重蹈覆轍呢?



6 comments:

  1. 之前有人話360頻頻出事,係因為開幕拜神燒豬擺錯方位;但其實以大佛為背景去切肉食肉,本身就已經對佛不敬,換左我係佛祖都唔會去保佑你啦... 真係罪過、罪過...

    ReplyDelete
  2. "陳鑑林﹕傳燒豬擺錯位 - 昂坪360諸事不順"

    大哥,人家天壇大佛是中國四大佛像,整得神州大地都照得住,就是不喜歡你搞什麼360,食燒豬?人家吃齋的啊!

    hahahahaha

    They are so stupid!

    ReplyDelete
  3. 拜佛在教理上殺生是大忌,假若把牲口作祭禮便是冒犯。有乜理由咁x大個政府,釋智慧大師,都唔知道所拜神靈的屬性,大膽到用牲口做祭品。

    今次係繼肥平求籤後,香江另一經典靈異事件!

    ReplyDelete
  4. 唔知大家有冇聽過, 回歸果時, 大陸有位呀水送左個鼎俾香港, 贈下興

    鼎,係象徵權力, 只有天子先有權睇, 可惜董生將佢擺左係大佛附近, 都算LA,

    後尾, 果鼎斷左隻腳, 要收番埋. 而董生最後都因為腳痛而被中央回收....

    睇黎, 中國既易經, 內含大量智慧...

    ReplyDelete
  5. 後尾, 果鼎斷左隻腳, 要收番埋. 而董生最後都因為腳痛而被中央回收....


    唔通老董的命運一早已是命中注定,真是佛法無邊,阿彌陀佛!

    ReplyDelete
  6. 一早命中注定!!

    hAhHAHHAhHA

    Do not piss off the higher powers.

    ReplyDelete