Thursday, April 24, 2008

香港富家子弟大喜訊

大家都知道,花旗國人民好多年都係信貸「癮君子」。借錢呢樣嘢已完全融入佢哋嘅文化當中。佢哋每日24小時嘅起居飲食,甚至預見嘅未來生活計劃,統統都倚賴佢哋一向享受到嘅信貸。

自從舊年信貸危機開始,呢種對借無窮無盡資金嘅依賴,就開始引發好多影響花旗國人民一向生活模式嘅現象。

花旗國信貸泡沫爆破,簡單嚟講就係借錢難咗。信用卡、樓宇按揭、汽車貸款等嘅信貸活動不斷萎縮。結果就係消費下降、樓價下跌、汽車銷售冇眼睇。直至現在,以上三種類別,都係最多人講嘅信貸問題。自自然然令好多人,集中講呢三種信貸活動萎縮嘅結果。

原來除咗以上嘅信貸類別出問題,仲有一個信貸市場現在已經變成花旗國最迫切性嘅問題。呢種信貸,就係學生借錢去讀書。

美學生貸款大幅縮減


以前,學生貸款非常容易。首先有政府嘅直接貸款,其次就有政府作擔保人,由私人公司放債。如果咁都未夠,啲學生仲可以借專為他們而設嘅貸款。

不過,今時唔同往日。上個禮拜,全美最大學生貸款嘅放債公司Sallie Mae嘅總裁已警告,學生貸款嚟緊會非常難借。同一個禮拜,花旗銀行同美銀都跟早排美國滙豐一樣,宣佈撤出學生貸款市場。

結果係點?好多大學生為今年9月開學嘅學費同生活費煩惱。分分鐘好似我大學第二年(97年)嘅9月一樣,有好多來自南韓、印尼嘅同學放暑假後從校園中消失。

以前,如果普遍社會預期經濟周期將會逆轉,或已步入衰退,大家都會見到啲大學,特別係後學士學位嘅課程,會特別多人報讀。不過,今年報讀生就會好似花旗國消費者一樣,唔係冇心,只係因為借唔到錢,而有心無力。

不過呢個情況,對特區富家子弟嚟講係大喜訊。如果有一批人突然唔報讀大學課程,剩餘報讀生面對嘅競爭就會大減。所以如果你一向想去花旗國留學,手頭又已經有錢讀書。現在就係好時機,應該開始去準備考試,攞定推薦書,準備填表,因為09年9月開班嘅課程,應該會比較易入。

4 comments:

  1. dear mr. pakman,
    what is your view on WM stocks ?
    any sign of going up again ?
    i am holding Wamu 200 share @ 10.15
    when should i sell ?
    -thanks

    ReplyDelete
  2. i dont know......i work there.....and 10.15 is low so i buy lor

    ReplyDelete
  3. Knowing you bought wamu AND work there

    When you say "plshelpmela"...

    Surely you are not asking me... but asking god itself.

    Incredible you have your wealth AND income stream tied up in the same source.

    ReplyDelete