Tuesday, September 02, 2008

天然氣運輸出口

幾年前,孫柏文仲係石油股分析員時,油價仲係比較平。當時除咗煤炭,基本上冇乜其他能源燃料,平或好用得過石油。

點都好,可能因為當年俄羅斯邀請咗幾間外資石油公司,開發日本以北嘅天然氣田,所以嗰啲油公司就諗方法,點樣賣呢啲天然氣。

氣田位於比較南部嘅艾克森美孚ExxonMobil,因為比較近遠東北亞地區,就自自然然想將天然氣,以氣體方式用氣管運輸。不過因為鄰國嘅地緣政治,一直只能議而不決、決而不行。

成本高又不環保

不過,氣田位於比較偏遠北部嘅蜆殼Royal Dutch Shell,就希望可以將天然氣液體化,跟住用船運輸。咁就可以擺脫地緣政治限制,鍾意賣氣畀邊個就賣畀邊個。

我作為一個用經濟學睇嘢嘅人,驟眼當然鍾意蜆殼,多過艾克森美孚嘅運輸方法。原因係,當公司能夠鍾意賣畀邊個都得時,就可以賣畀出價最高者。

不過,經過進一步研究之後,我就對「天然氣液化用船運輸」呢個好有保留。因為要將沸點喺攝氏零下161度嘅天然氣液化需要大量能源,而液化之後維持液狀又要另一筆能源,所以最終由氣田到終點,分分鐘已經消耗超過六成嘅天然氣去作液化維持之用。既冇成本效益,仲要因為排出二氧化碳,可能喺環保角度上唔值。

仲有,如果大家睇過講中東石油嘅《油激暗戰》 Syriana。記唔記得裏面個後生仔,變成自殺式炸彈人之後,炸啲乜?冇錯,運輸液化天然氣嘅船,因為天然氣嘅物理特性,基本上就係一個識浮嘅炸彈,所以個後生仔就揀咗呢啲船嚟炸。亦因為咁,船同終點接收站嘅地方,一定要投入大量資本,先至可以確保一定程度嘅安全性。

憂東江水鬧劇重演


因為睇過以上嘅資訊,當年中電(002)宣佈要搞液化天然氣進口,我都有擔心過。不過到今日,政府宣佈會從大陸進口天然氣,我都冇擔心液化天然氣嘅理由。

不過就換嚟新嘅擔憂,就係究竟大陸夠唔夠天然氣。唔夠嘅話,會唔會重演東江水嘅鬧劇,特區出高價買,但用唔晒,大陸就唔夠用。

2 comments:

  1. 早日全面使用核能..
    可能仲好???

    現在伊朗出石油都用,你話呢??

    ReplyDelete
  2. 其實香港有好多能源,好次風力呀,打一次風呀,發d電香港可以用成個月。
    香港又有好多酒樓,d食物又用好多食用油泥炒,所以會出好多食用廢油,而外國有用食用廢油轉成油渣比巴士用。
    我又知道香港有人,好次是(香港政府)用污水產生d污泥再產生可然燒氣體泥發電。

    ReplyDelete