Friday, September 05, 2008

一票獨投黃毓民

禮拜日,投票日。08年立法會選舉嘅競選期,都已經過咗好幾個禮拜。唔知道大家有冇留意到小弟完全冇講過今次選舉?有冇覺得怪?點解?老實嚟講,提唔起勁。

真心揀人代己議政

不過大家唔好誤會,我一定會投票。揀我覺得能代表我自己,喺立法會議政嘅人。如果唔係,都唔會叫代議政制。今日呢篇文,就係選舉日之前最後一篇,我亦想把握呢個機會,同大家分享我會投邊個一票。不過講之前,想提供一啲背景資料。

首先,黎智英、施永青同我,都係住喺九龍西選區,我住深水埗天台屋(有契嘅,多謝關心!)。以前住港島區,今次第一次喺九龍西投票。所以我一定要承認,就算今次對眾候選人嘅政綱,讀到滾瓜爛熟。感覺上,未去到以前港島區嘅親切。

點都好,競選期開始時,我抱住一個「咩人都可以攞我嗰票」嘅態度,等啲候選人嚟攞。之後,真係對啲政綱好熟。不過就算熟,仍未有定案,直至睇到一段8分鐘長嘅短片。段片就係Now TV九龍西選區嘅辯論。YouTube搜尋「毓民拔刀相助」。

法理有權政治戇居

嗰8分鐘,就係民建聯團隊同社民連黃毓民,每張名單4分鐘自由發問時間。第一個4分鐘,民建聯嘅鍾港武就問民主黨團隊,排喺涂謹申之後嘅林浩揚,點睇涂謹申之前捲入「租議員辦事處」事件。我絕對覺得係一條應該問嘅問題,因為我都想知。

點知,涂謹申唔畀佢答,仲要話團隊有權決定邊個答。

唔知道是否涂謹申係個律師,因為法理上你係有權,不過政治上就係戇居!如果涂謹申落選,真係估唔到係鍾港武搞掂咗佢。

當我非常頹喪之際,到黃毓民發問。基本上,佢一口摧毀民建聯。亦係整個選舉當中,第一次令我喺螢幕前,站起來拍手。

大家作為《金手指》嘅fan屎,都知道「一注獨贏」嘅明燈威力。

今次我一票獨投黃毓民,希望唔係對佢贏今次選舉嘅最大詛咒。就畀次機會你,good luck毓民,4年後一定要再參選,因做得唔好,我要親自踢你落車。


7 comments:

  1. 嗰日我有睇...黄毓民真係大快民心!
    可惜我唔係九龍西,如果唔係我都投俾佢...

    ReplyDelete
  2. 爽呀!~

    我可惜我都唔係九龍西。

    ReplyDelete
  3. 估唔到你呢個自由市場死硬派(又稱右膠)都會投票畀左仔(福利主義者).

    証明一點,敵人嘅敵人就係朋友.

    不過,如果我在九西住,我都會投畀佢.而家唯有投畀其他社民連候選人.

    我相信得佢哋班人先可以有效監察政府.另一方面,佢哋永遠冇可能當政,經濟理念係左係右冇乜所謂.

    ReplyDelete
  4. such stupid rules! why would any candidate willingly cede their minutes to the opposition so that the other side can elaborate? of course the candidate would be asking pseudo questions and not giving the other side a chance to "answer"...

    ReplyDelete
  5. 話時話,你都好夠羌,公然在蘋果日報撐毓民.
    乜你唔驚肥佬黎唔妥你咩?

    從來我都唔信有編採自主,今次令我有啲改觀(如果你一個月內唔被炒的話)

    ReplyDelete
  6. 你唔好忘記我們的Andrewbaby是明燈,愛佢變成害佢,咁你話Andrewbaby投毓民,會變成點喇?

    ReplyDelete
  7. 好一個以彼之道,還施彼身

    真係拍爛手掌

    毓民, 型呀

    ReplyDelete